Ministériu Defeza realiza serimónia assinatura ba termu nomeasaun foun ba kargu no diresaun xefia

Díli, 08 fevereiru 2024 – S. Exa. Ministru Defeza Kontra Almirante, Donaciano Costa Gomes ‘Pedro Klamar Fuik’, Ph.D, hamutuk ho Komisaun Funsaun Públika (KFP), kinta-feira ne’e, realiza serimónia asinatura ba membru Konsellu Diretivu sira hodi bele haforsa liu tan servisu iha Ministériu Defeza.

Ba empossadu sira, S. Exa. Ministru Defeza Kontra-Almirante, Pedro Klamar Fuik iha ninia diskursu hateten katak tomada de posse nu’udar jornada foun ida iha vida profisional, termu foun ida ne’ebé nakonu ho responsabilidade hodi serbí diak liu tan ita-nia Estadu no povu enjeral no lori diresaun no orgaun sira ne’ebé tutela ba Ministériu Defeza nian.

“Ha’u parabeniza no deseja oportunidade singulár hodi koko imi-nia kompeténsia, kapasidade no integridade hodi serbí estadu ho kultura organizasionál ida ne’ebé forte”, hateten S. Exa. Ministru Defeza Kontra Almirante Donaciano Costa Gomes iha ninia diskursu serimónia tomada posse nian. 

Governante ne’e mós hato’o ninia agradesimentu kle’an ba kargu xefia anteriór sira ne’ebé kontribui tebes liu husi sira nia empeñamentu, dedikasaun no profisionalizmu ne’ebé sira hatudu liu husi servisu ne’ebé sira halo iha Ministériu Defeza no instituisaun FALINTIL-Forsas Defeza Timor-Leste (F-FDTL) durante sira nia mandatu.

Iha okaziaun ne’e mós, governante ne’e apela ba funsionáriu sira hotu ne’ebé hakna’ar an iha Ministériu Defeza hodi prioritiza planu no programa sira ne’ebé aprova ona iha IX-Governu Konstitusionál hodi demonstra liu husi ema ida-idak nia profisionalizmu ho baze liu husi valor sira hanesan: sakrifísiu, empeñamentu, dedikasaun, abnegasaun, lealdade no obidiénsia iha servisu sira lor-loron nian liu husi kumprimentu ba lei no regra sira ne’ebé estabelese iha Ministériu Defeza.

Iha sorin seluk, Prezidente Interinu Funsaun Públika, Agapito da Conceição mós apela ba empossadu sira hodi bele responsabiliza ba kna’ar foun sira hotu ne’ebé membru konsellu diretivu sira assume liu husi kumpri regra no estatutu sira husi funsaun públika nian.

Entretantu ba nomeasaun no kargu xefia sira mak hanesan: Martinho Soares Moniz hetan nomeasaun hanesan Diretór Jeral Rekursu Defeza; Isabel Bareto Soares, Diretora Nasionál Administrasaun no Finansas, Dília Helena Souza, Diretora Nasionál Aprovizionamentu; Maria Kolomia de Oliveira, Diretora Nasionál Rekursu Umanu; Manuel da Silva, Diretór Nasionál Logístika, Infraestrutura no Patrimóniu; Alfredo Otílio Neves, Xefe Departamentu Ezekusaun Orsamentu; Cristalina da Canossa Barros, Xefe Departamentu Planeamentu ba Orsamentu; Siquita dos Santos, Xefe Departamentu ba Pagamentu no Ezekusaun ba Projetu sira; Avelino Soares, Xefe departamentu ba Administrasaun no Kontratasaun Públika; Lidia Pires, Xefe Departamentu ba Administrasaun Rekursus Umanus; Ilidio Brito Ximenes, Xefe Departamentu ba Dezenvolvimentu Rekursu Umanu; Luis Hermenegildo da Costa, Xefe Departamentu Logístika no Manutensaun; no Eustaquio Mateus Ximenes, Xefe Departamentu Infraestruturas, Patrimóniu, Inventariasaun no Arkivu. 

Partisipa iha serimónia refere, Ministru Defeza Kontra Almirante, Donaciano Costa Gomes, Ph.D, Prezidente Interinu Komisaun Funsaun Públika, Sr. Agapito da Conceição, Xefe Estadu Maiór Jeneral Forsa Armada (CEMGFA), Tenente Jenerál, Domingos Raul ‘Falur Rate Laek’, Vise CEMGFA Majór Jenerál Calistro dos Santos ‘Coliate’, Xefe Estadu Maiór Bgen José da Costa ‘Trix’, Almirante Silva e Ribeiro husi Portugal, Xefe Gabinete – MD Sra. Ana Carla Carascalão Gomes, Xefe Gabinete AMN  Capitão Mar e Guerra  Adao Brito ‘Zeki’, Diretór –Jerál  Politika Defeza Nasionál Sr. Nuno Carlvalho Santos, Diretóres Nasionál,  Asesores Nasionál no Internasionál no Funsionáriu Ministériu Defeza tomak.

Média MD