Ministru Defeza Donaciano da Costa Gomes partisipa iha enkontru Konsellu Superiór Defeza no Seguransa

Díli, 08 fevereiru 2024 – Kinta-feira ne’e, Sua Ex. Ministru Defeza, Kontra-Almirante, Donaciano Costa Gomes‘Pedro Klamar Fuik’, Ph.D, partisipa iha enkontru Konsellu Superiór Defeza no Seguransa ne’ebé konvoka husi S. E. Presidente Repúblika, José Ramos-Horta, iha Palásiu Presidensiál, Bairro-Pite, Díli.

“S. E. Prezidente Repúblika José Ramos-Horta hato’o nia apresu boot ba joven sira hotu, liu-liu responsável grupu artes marsiais no artes rituais sira hotu, ne’ebé hafoin hasai tiha desizaun suspende atividade artes marsiais nian komesa diminui ona konfrontu sira”, dehan S. E. Primeiru Ministru, Kay Rala Xanana Gusmão hafoin remata enkontru ho Konsellu Superiór Defeza. 

Xefe Governu ne’e mós subliña liu tan katak, Prezidente louva teb-tebes joven sira hotu tanba durante selebrasaun natal no tinan foun la akontese konfrontu ruma, tanba ne’e mak Xefe-Estadu, José Ramos-Horta fiar katak ho joven sira nia partisipasaun ne’ebé ho konsiénsia tebes bele hanoin daudaun oin nusá ita bele lori rai ida ne’e ba oin.

Assuntu seluk ne’ebé membru Konsellu Seguransa sira diskute mak krime organizadu, money laundry, tráfiku umanu no droga, tanba ne’e S. E. Prezidente apela atu governu, liu-liu parte seguransa no defeza bele tau atensaun máximu hodi bele kombate kazu hirak ne’e iha Timor-Leste.

Xefe-Governu ne’e akresenta liu tan katak, assuntu seluk ne’ebé Konsellu Superior Defeza no Seguransa diskute mak preparasaun ba vizita Santu Padre, Papa Francisco I ne’ebé tuir kalendariu sei mai vizita Timor-Leste iha fulan agostu tinan ida ne'e. tanba ne'e mak fulan hirak liu ba Komissaun husi Vatikanu mai ko’alia ona ho Komissaun preparativu ne’ebé forma husi governu. Ba assuntu ida ne’e, Prezidente Repúblika husu exekutivu atu koordena ba malu hodi prepara ho didiak ba vizita refere.  

Média MD