Ohin, Tersa-feira, 20 Fevereiru 2024 -  S. Exa. Ministru Defeza, Kontra-almirante, Donaciano da Costa Gomes ‘Pedro Klamar Fuik’, Ph.D, simu vizita kortezia ida husi Embaixador Estraordináriu no Plenipotensiáriu Repúblika Islámika Pakistaun, Sr. Ameer Khurram Rathore iha nia kna’ar fatin Ministériu Defeza, Fatuhada, Díli.

Reprezentante Repúblika Islámika Pakistaun iha Jakarta-Indonésia ne’e aproveita hasoru malu ho Ministru Defeza S. E. Donaciano Gomes ‘Pedro Klamar Fuik’, Ph.D, hafoin iha segunda-feira (19/02/24) mai aprezenta nia karta kredensial ba Xefe Estadu José Ramos-Horta hamutuk ho nasaun sanulu resin ida ne’ebé la rezidente iha Díli.  

 “Iha vizita ida ne’e, hanesan ita bot sira hatene Pakistaun ita nia pais amigu ida desde primeira hora quando  TL hetan  prosesu da kontrusaun do estadu no nasaun iha kedas missaun Nasoens Unidas nian, pakistan haruka nia batalaun ida kolokadu iha Timor-Leste hanesan peace keeping force no ita dezenvolve amizade diak teb-tebes entre militares no ita-nia populasaun sira ho forsa pakistanes ne’ebé altura ne’e koloka iha ita-nia rain” tenik S. E. Pedro Klamar Fuik hafoin remata enkontru.

Iha parte seluk, Embaixador Ameer mós hato’o agradese ba akollamentu husi Timor-Leste ne’ebé hatudu liu husi amizade ne’ebé estabelese tiha ona iha passadu.

“Hatene katak Pakistaun iha relasaun ida ne’ebé klean tebes ho povu Timor – Leste, tanba ne’e mak hau mai hasoru malu ho Ministru Defeza no ami identifika área balun atu bele haforsa ami nia kooperasaun entre nasaun rua iha kolaborasaun domíniu defeza ba futuru”, hateten Sr. Ameer Khurram Rathore.

Rekorda katak, forsa pakistaun sira nia kontribuisaun iha prosesu konstrusaun estadu mak iha área komunikasaun no engeñaria iha Timor-Leste nia prosessu konstrusaun estadu no nasaun.

Média MD