Díli, 15 fevereiru 2024 – Ohin kinta-feira, S. E. Ministru Defeza, Kontra Almirante, Donaciano da Costa Gomes ‘Pedro Klamar Fuik’, Ph.D, partisipa iha serimónia toma posse ba Ministru Justisa foun, Dr. Sérgio de Jesus Fernandes da Costa Hornai, iha resintu Palásiu Presidensiál, Aitara Klaran, Díli.

Tuir konstituisaun RDTL artigu 106 kona-ba nomeasaun, iha aliña-2 hateten katak membru Governu sira seluk, Prezidente Repúblika mak sei hili liu husi Primeiru-Ministru nia proposta, tanba ne’e mak tuir Dekretu Prezidente Repúblika N. 12/2024, nomeia ona Dr. Sérgio de Jesus Fernandes da Costa Hornai ba Ministru Justisa hodi subtitui hikas maktoban Dr. Amándio de Sá Benevides.

Prezidente Repúblika iha ninia diskursu, husu Ministru Justisa foun atu bele lidera setór Justisa ho independente, kompetente no imparsiál hodi bele garante justisa ba sidadaun hotu iha Timor-Leste.  

“Onra boot ida hodi bele fó posse ba Ministru Justisa foun, Dr. Sérgio Hornai ba kna’ar brillante ida ne’e hodi bele apoia liu tan setór justisa iha Timor-Leste, liu-liu servisu nesessáriu sira iha Ministériu refere hodi bele dudu responsavél hotu ne’ebé hamahan an iha Ministériu Justisa bele ezerse sira nia funsaun ho diak”, hateten Prezidente Repúblika iha ninia diskursu toma posse ba Ministru Justisa foun.

Durante serimónia, S. E. Prezidente Repúblika, José Ramos Horta mós hato’o ninia sentidu kondolénsia profunda ba família maktoban S. E. Amandio de Sá Benevides no agradese ba servisu hotu ne’ebé nia halo iha setór judisiáriu, partikularmente hanesan Ministru Justisa.

Partisipa iha serimónia refere mak: Primeiru Ministru Kai-Rala Xanana Gusmão, Prezidente Tribunal Rekursu, Dr. Deolindo dos Santos, membru Parlamentu Nasionál, membru Governu no mós reprezentante husi instituisaun no organizasaun sira iha Timor-Leste.    

Media MD