“Tempu Profisionaliza, tempu Moderniza” , nu’udar tema ba selebrasaun XXIII transformasaun FALINTIL ba F-FDTL

Díli, 02 fevereiru 2024 – S. E. Ministru Defeza Kontra-Almirante, Donaciano da Costa Gomes ‘Pedro Klamar Fuik’, Ph.D, sexta-feira ohin, partisipa iha loron transformasaun FALINTIL ba Falintil-Forsa Defeza Timor-Leste (F-FDTL) ba dala 23 ho tema “Tempu Profisionaliza, tempu Moderniza”  iha Quartel General Fatuhada, Díli.

Iha entrevista ho média nasionál sira, Ministru Defeza, Kontra-Almirante Pedro Klamar Fuik hateten katak transformasaun ne’e importante liu iha organizasaun ida ba organizasaun seluk ne’ebé hola parte iha passadu resente ida no organizasaun ida ne’e tutan fali ba iha prezente-futuru ida ne’ebé ohin ita hanaran Falintil-Forsa Defeza Timor-Leste (F-FDTL).

Governante ne’e fundamenta liu tan katak F-FDTL iha naran rua, ida pertense ba passadu libertadora no ida pertense ba prezente-futuru dezenvolvimentu iha prosesu konstrusaun estadu no nasaun, tanba ho prezensa husi forsa armada mak bele assegura dezenvolvimentu no soberania rai ida nian.

S. E. Ministru Defeza mós subliña katak selebrasaun transformasaun ba dala-23 ne’e iha aspetu barak ne’ebé presiza haré iha ne’e. Aspetu ida maka iha kualifikasaun ba rekursu umanu, segundu, iha mudansa barak husi forsa foun ne’ebé maka komesa substitui ona forsa sira ne’ebé pertense ba iha Falintil; infrastrutura ne’ebé maka uluk laiha agora ita komesa iha ona infrastrutura balun, fardamentu sira komesa uniformizadu no parte importante liu maka kestaun jurídika ne’ebé mak permite atu forsa armada ida la bele boot liu ita nia estadu nia kapasidade atu sustenta forsa armada.        

Durante serimónia, Xefe-Estadu-Maiór Jenerál (F-FDTL), Tenente Jenerál, Domingos Raul ‘Falur Rate Laek’ sauda ho onra no admirasaun ba povu Timor-Leste, feto no mane, ferik-katuas no joven sira, ne’ebé maske ho desafiu oi-oin, tau konfiansa iha forsa armada aumenta husi loron ba loron hodi bele dezenvolve no assegura Timor-Leste nia soberania ho diak liu tan.

“Maske ita hasoru dezafiu sira durante prosesu kresimentu, ita sei nafatin iha fiar, servisu maka’as, haburas firmeza hodi serbí no fó motivasaun, atu nune’e ita bele dezenvolve polítika ne’ebé favoravel ba dezenvolvimentu forsa armada”, hateten Tenente Jenerár Falur Rate Laek iha ninia diskursu ba loron aniversáriu transformasaun nian ba dala 23 iha Fatuhada.

Tenente Jenerál ne’e salienta liu tan katak, ohin loron, ita-nia militár sira lori ho bandeira nasaun no instituisaun nian hodi bele apoia mós rejiaun seluk ne’ebé hasoru problema  hanesan iha Repúblika Sudaun Sul no iha nasaun sira ne’ebé Missaun Paz nian solisita F-FDTL nia apoiu. No iha rai laran ita-nia forsas armadas mós kontribui maka’as dezenvolvimentu infraestrutura sira hodi apoiu populasaun, buka hadia sira nia kondisaun bázika moris nian, no apoiu ba dezenvolvimentu infraestrutura ba sira nia Komponente no Unidade sira. 

Rekorda katak, dezenvolvimentu ba forsa armada hahú iha Aileu, iha 2001, liu husi dezisaun ne’ebé líder sira deside hodi transforma FALINTIL husi ita-nia forsa libertadora no iregulár sira ba forsa armada regular ida ne’ebé ohin hamrik hanesan instituisaun ida ba tinan 23. 

Partisipa iha serimónia refere, Vise-Prezidente Parlamentu Nasionál, Dr. Alexandrinho Afonso Nunes, Prezidente Tribunal Rekursu, Dr. Deolindo dos santos, reprezentante Santa Sé iha Timor-Leste, membru  parlamento nasional, membru governo, korpu diplomátiku, xefe Esadu-Maior Exersítu Portugal, Jenerál Eduardo Manuel Braga da Cruz, komandante naval Mariña português, Vise-Almirante José Nuno dos Santos Chaves Ferreira, Jenerál Douglas Pashey husi Austrália no eis-titulár sira.   


Media MD