Díli, 05 fevereiru 2024 – ohin, Segunda-feira ne’e, S. E. Ministru Defeza Kontra-Almirante Donaciano da Costa Gomes ‘Pedro Klamar Fuik’, Ph.D, sai inspetór ba serimónia Içar Bandeira Nasionál ba semana dahuluk fulan fevereiru, iha resintu Kuartél Jeneral Falintil-FDTL Fatuhada, Díli.

S. E. Ministru Defeza Donaciano Gomes ‘Pedro Klamar Fuik’, iha ninia diskursu hateten katak, serimónia isar bandeira ne’e importante atu ita presta ita-nia respeitu ba símbolu nasionál ne’ebé mak: halibur ita, reprezenta ita-nia ukun rasik an, no fó liberdade ba ita hodi hatudu ita moris iha estadu ida nia laran.

“Hanesan baibain, iha prinsípiu fulan nian ita fó minutu balun atu fó valor ba ita-nia símbolu nasionál no Símbolu Estadu nian. Ita hahú fulan-fulan la’os atu sai ábitu ida, maibé, atu tama iha ita ida-idak ninia konsiénsia katak Símbolu Estadu ne’ebé ita tenki serbí lor-loron iha ita-nia vida, iha ita-nia Estadu, no liu husi ita-nia atividade lor-loron, ita presiza minutu balun kada fulan iha formatura ida atu ita presta ita-nia omenajén ba ita-nia Símbolu Nasionál”, dehan Ministru Defeza.

Nia subliña liu tan katak, organizasaun no instituisaun hotu-hotu iha devér ida atu bele interioriza katak fulan-fulan primeira semana servidór hotu-hotu iha instituisaun nia laran bele iha konsíensia diak no iha enerjia atu bele serbí ita-nia Pátria no serbí interese públiku ho diak.

“Se ita la hahú ho konsiénsia ida tranquillu ba iha regulamentu sira ne’ebé mak ita estabelese no regra ki’ik sira, ita sei la kumpri missaun boot sira ne’ebé Estadu no Nasaun konfia mai ita atu halo”, fundamenta governante.  

Partisipa iha seremónia Isar bandeira ne’e maka hanesan; funsionáriu sira iha Ministériu Defeza ne’ebé kompostu husi Xefe Gabinete, Diretór Jerál Rekursu Defeza, Diretór Nasionál, Xefi Departamentu, Assesor nasionál no internasionál, Xefe Estadu Maiór F-FDTL Brigadeiru Jenerál José da Costa Soares ‘Trix’, ofisiais, sarjentu no soldadu sira iha Kuartel Jenerál.

Media MD