Díli, 12 marsu 2024 – Ohin, S. Exa. Ministru Defeza, Kontra-Almirante, Donaciano da Costa Gomes ‘Pedro Klamar Fuik’, Ph.D, realiza enkontru bilateral ho Embaixador Fransa ba Jakarta no Timor-Leste iha Ministériu Defeza, Fatuhada, Díli.

Durante reuniaun, Ministru Defeza Pedro Klamar Fuik no Embaixador Fabien Penone reafirma komitmentu hodi reforsa lasu bilateral iha domóniu no seguransa marítima, liu-liu importánsia ba Kooperasaun no kombate ameasa sira husi área marítima, hanesan peska ilegal, perata, no kontrabandu. No Fransa iha komitmentu hakarak reforsa Timor-Leste nia kapasidade kontrolu ba área tasi nian.

“Depois de enkontru ida ne’e, marineiru Timor-Leste balun sei halo viajen ho ekipa marineiru sira husi Fransa hodi observa no aprende kona-ba área mariña nian. No ida ne’e mak pasu importante ida ba kooperasaun entre Timor-Leste no Fransa”, afirma Ministru Defeza Pedro Klamar Fuik.

S. E. Embaixador Penone elogia Timor-Leste ne’ebé promove seguransa marítima no reafirma sira nia empeñamentu hodi kapasita ita nia mariñeiru sira hodi adapta ba uzu teknolojia. Nia subliña tan katak seguransa marítima ne’e importante ba estabilidade regional nian no ba dezenvolvimentu ekonómiku tanba ne’e mak Fransa sei apoiu Timor-Leste nia inisiativa sira ba área refere.  

“Ami hakarak estabelese Kooperasaun ida ho Timor-Leste tanba valor komun sira hanesan demokrasia, direitus humanus no respeita ba lei internasionál sira ne’ebé estabelese ona, no Timor-Leste mós iha ambisaun ne’ebé hakarak apoiu goverñansa multilateral”, afirma Embaixador Penone.  

Diplomata ne’e mós akresenta katak, Timor-Leste mós dezempeña papél importante ida iha rejiaun refere ho nia adezaun ba ASEAN no nia pozisaun geográfika iha Indo-Pasífiku ba seguransa marítima nian.

“Ami iha teritóriu iha rejiaun refere, espesialmente Nova Kaledónia, ne’ebé besik hela rejiaun refere, ho kapasidade seguransa balun ne’ebé ami iha, ami hakarak halo diskusaun ho Timor-Leste hodi dezenvolve ami nia defeza seguransa operasionál iha rejiaun refere”, subliña Embaixador Penone.

Reuniaun refere termina ho troka prezente entre Ministru Defeza S. E. Pedro Klamar Fuik no Embaixador Fransa Fabien Penone iha Sala Kortejia Ministériu Defeza Fatuhada, Díli. 

Media MD