Ministro Defesa no Embaixadora Nova Zelândia Fortalese Lasu Kooperasaun

Díli, 14 Marsu 2024 - Ohin, S. Exa. Ministru Defeza Timor-Leste, Kontra-Almirante, Donaciano da Costa Gomes 'Pedro Klamar Fuik', Ph.D, hetan vizita no reuniaun kordial ida Embaixadora Nova Zelândia, Sra. Helen Tunnah, iha edifísiu Ministériu Defeza Fatuhada, Díli.

S. Exa. Ministru Defeza, Kontra-Almirante Pedro Klamar Fuik, expresa ninia gratidaun ba kooperasaun kontínua entre Timor-Leste ho Nova Zelândia durante prosesu konstrusaun estadu no nasaun. Alénde ne'e, governante ne'e mós infatiza kontribuisaun importante ne'ebé kontinua oferese husi Nova Zelândia ba Intitutu F-FDTL no Ministériu Defeza.

Durante reuniaun, Embaixadora mós aproveita hodi kongratula S. Exa. Ministru Defeza Timor-Leste no diskute área importante sira ba kooperasaun entre Timor-Leste no Nova Zelândia ne'ebé hala'o tiha ona, liu-liu iha área defeza no seguransa.

Aspetu essensiál seluk husi reuniaun entre Governante ho Embaixadora maka diskute klean kona-ba kontinuasaun ba kooperasaun ne'ebé estabelese ona. Parte rua kompartilla perspetiva kona-ba kestaun seguransa no dezenvolvimentu Timor-Leste nian, no Nova Zelândia iha kompromisu hodi apoiu nafatin Timor-Leste iha área seguransa, edukasaun no agrikultura.

Husi parte seluk, Embaixadora Helen mós destaka komitmentu Nova Zelândia nian hodi apoiu setor importante sira Timor-Leste nian, liu-liu seguransa no defeza ne'ebé hahú kedan iha prosesu independénsia país nian ho envolvimentu forsas armadas Nova Zelândia nian iha INTERFET.

Reuniaun entre S. Exa. Ministru Timor-Leste no Embaixadora Nova Zelândia reprezenta avansu signifikativu ida ba promosaun no kolaborasaun mútua no haforsa liu tan lasu diplomátiku entre nasaun rua.

 

Média MD