Díli, Sábado, 02 marsu 2024, Ministru Defeza, Kontra-Almirante, S. Exa. Donaciano da Costa Gomes ‘Pedro Klamar Fuik’, Ph.D, sai oradór ba palestra ba loron Veteranus Nasionál ba da-VII ne’ebé monu iha loron 3 marsu ho tema ”Juntos Marcharemos para o Futuro” iha Sentru Konvensaun Díli. 

Tópiku ne’ebé S. Exa. Ministru Defeza lori maka “Papél Juventude iha pasadu, Prezente no Futuru”.   

 Durante intervensaun, governante ne’e hateten, “Foin-sa’e hanesan periodu moris ida, hanesan Estadu de Espiritu ida, hanesan hanoin ida iha prezente no mehi ida ba oin, korajen ida hasoru difikuldade, hanesan postura desiziva hodi supera ta’uk hodi atinji ideal ida”. 

Ministru Defeza, fundamenta liu tan katak, iha pasadu juventude inspira luta ba lia los, justisa no domin. Ho espírito ne’ebé la mate ba revolusaun, mehi ne’ebé fundamenta ideal ba liberdade no ba independénsia. Juventude ho nia luta, dispoen sakrifísiu iha orden hotu-hotu, fó nia vida tomak, dedikasaun exlusiva ho abnegasaun tomak ba kauza libertasaun Timor-Leste nian. 

Kontra-Almirante ne’e mós rekorda katak asaun husi Frente Klandestina ne’ebé hala’o sekretamente iha zona okupada sira ne’ebé sakrifika ema barak nia vida tantu feto no mane, liu-liu juventude ne’ebé luta ho abnegasaun ba liberdade no independénsia nasaun nian merese atu louva no jerasaun foun sira tenki banati tuir hodi konstroi mehi no Timor-Leste ida ne’ebé ideál ne’ebé garante paz no estabilidade ba povo no sosiedade.  

“Juventude iha prezente tenki kompromete atu ativamente enkuadra a’an iha prosesu konstrusaun Estadu no Nasaun; juventude tenki konkista espasu foun hodi bele esatabelese identidade foun Timor-Leste nian hodi bele kompete iha era globalizasaun nian”, subliña Ministru Defeza, Kontra-Almirante, Donaciano da Costa Gomes ‘Pedro Klamar Fuik’ iha ninia intervensaun. 

Governante ne’e mós ho optimista, hateten katak, joven sira mak futuru líder nasaun nian, no juventude sira iha papél fundamentál atu responsabiliza ba transformasaun ba Timor-Leste ida ne’ebé prósperu liu; tanba ne’e mak S. E. Kontra-Almirante husu ba foinsa’e sira atu kapasita a’an ho kualidade diak liu hodi asesu oportunidade ba empregu no ba realizasaun pessoal no profesionál ne’ebé diak ba vida pessoal no nasaun nian. 

Governante ne’e mós subliña katak IX-Governu iha medidas lubuk ida ne’ebé bele garantidu hodi bele kria oportunidade ba joven sira hodi konkretiza poténsia ne’ebé juventude sira iha hodi bele harí Timor-Leste ida prosperu liu. 

Medida hirak ne’ebé prevé iha planu governu nian mak: 

1. Implementa  Política Nacional Juventude no plano aksaun nasionál hodi  promove dezenvolvimentu no autonomia Juventude sira nian;

2. Reforsa funsionamentu  Konsello Nacionál Desenvolvimentu ba Juventude, iha sentidu atu kria kondisaun ba koordenasaun ne’ebé diak entre entidade públika no privada sira, ne’ebé asegura dinamizasaun inisiativa sira ba joven sira no ingresu sira iha merkadu servisu nian, no mós garante preparasaun polítika no aplikasaun ba planu aksaun nasionál, relasiona ho estratégia sira ne’ebé aprova iha Polítia Nasionál Juventude nian;

3. Apoiu ba estabelesimentu ba Asosiasaun joven sira nian.

4. Kontinua promove Parlamentu Foinsa’e, inklui kapasitasaun iha área lideransa, valor síviku, hanoin kritíku, kapasidade atu debate no halo análize sosiál;

5. Konstroi Sentru Nacionál Juventude ida iha Díli (PED 2020);

6. Desenvolve kondisaun iha Kampu Formasaun Lideransa, hodi promove kondisaun físika diak, kualifikasaun administrativa, rezolusaun konflitu no valor síviku sira;

7. Mellora Sentru Juventude sira ne’ebé existente no konstrusaun ba Sentru Multi-funsaun  Juventude sira  iha munisípiu sira hotu, halo formasaun iha área sira hanesan língua, teknologia, arte, músika, desportu no edukasaun sívika;

8. Promove Jornada Juventude.

Oradór mós iha eventu refere mak Tenente Jenerál reformadu, Lere Anan Timur ho tópiku – “Eventu Istóriku 3 marsu Maubai ne’ebé inspira ita ba prosesu luta libertasaun nasionál ba pátria” no S. E. Ministru Assuntu Kombatente Libertasaun Nasionál, Gil da Costa ‘Oan Soru’ ho tema – “Promove Sentidu Estadu, partilla espíritu pertense no la’o hamutuk ba Dezenvolvimentu Nasionál”. 

Partisipa iha semináriu refere, Prezidente Tribunal Rekursu, Dr. Deolindo dos Santos, Membru Parlamentu Nasionál, Membru Governu, Konsellu Kombatente veteranus, Organizasaun rezisténsia sira, Autoridade Munisípiu Díli, Sr. Grigório Saldanha, Embaixadora Portugal iha Timor-Leste, Sr. Manuela Barros, konvidadu husi nasaun amigu hanesan Portugal, Australia no Nova Zelandia; akadémiku no estudante sira ne’ebé rezidente iha Díli. 

Média MD