Ohin, Sexta-feira, 31 Maiu 2024 – Ministériu Defeza, liu husi Xefe Gabinete, Sra. Ana Carascalão Gomes, Diretór-Geral Polítika Defeza Nasionál (DG-PDN), Sr. Nuno Carvalho Santos, no Diretór-Jeral Rekursu Defeza, Sr. Martinho Soares Moniz hala’o enkontru kortezia ho Supertendente Akademia Naval Dalian, RADM SHAO Shuguang ho ninia delegasaun iha edifísiu Ministériu Defeza Fatuhada, Díli.

Enkontru refere realiza iha ámbitu vizita Ró naval Qi Jiguang iha Timor-Leste ne’ebé sei atraka iha Portu Díli durante loron tolu.

Objetivu husi enkontru mak hametin amizade entre Timor-Leste ho governu Xina, haforsa komunikasaun diak iha área defeza entre rai rua no promove paz no estabilidade iha regiaun refere.

Durante enkontru, Xefe Gabinete Sra. Ana Carascalão Gomes, hodi Ministru Defeza, Kontra-Almirante, Donaciano da Costa Gomes ‘Pedro Klamar Fuik’, Ph.D, nia naran agradese ba governu Xina ne’ebé apoiu maka’as governu Timor-Leste liu-liu iha setór defeza no ekonomia.

Husi parte seluk, Supertendente Akademia Naval Dalian, RADM SHAO Shuguang mós agradese ba hospitalidade no jestu amizade ne’ebé sira senti husi ema Timoroan sira, liu-liu governante no militár sira ne’ebé simu sira iha Portu Díli.

RADM SHAO subliña liu tan katak ninia impresaun ba Timor-Leste mak nakonu ho ksolok, hospitalidade ne’ebé nakonu ho amizade no beleza natural ne’ebé atraente tebes ba delegasaun tomak husi Naval Xina.

Hafoin remata enkontru, parte rua troka malu ho prezente nu’udar símbolu atu promove mós produtu nasionál husi Timor-Leste no hametin liu tan kooperasaun entre nasaun rua iha setór Defeza hodi garante paz no estabilidade iha regiaun refere.

Média MD