Brigadeiru Jenerál Enfatiza Servisu Kooperasaun Iha Ministériu Defeza

Ohin, segunda-feira, 03 Juñu 2024 – Funsionáriu tomak husi Ministériu Defeza hamutuk ho FALINTIL-Forsa Defeza Timor-Leste (F-FDTL), realiza atividade Isar Bandeira Nasionál ba semana dahuluk iha resintu Kuartél Jeneral Fatuhada, Díli.

Iha atividade Isar Bandeira RDTL ne’e, inspektór serimónia, Xefe Estadu Maior Brigadeiru Jeneral, José da Costa ‘Trix’ enfatiza atu funsionáriu hotu-hotu, tantu, husi Ministériu Defeza no Instituisaun F-FDTL atu bele koopera malu ho diak hodi bele lori instituisaun Defesa ba oin.

Brigadeiru Jenerál ne’e mós husu ba dirigente sira hotu atu tau iha prátika kona-ba servisu kooperasaun entre Instituisaun rua atu bele aselera servisu sira hotu ne’ebé Ministériu hakarak atinji tuir planu tinan ida ne’e nian.

Aleinde kooperasaun iha servisu fatin, Brigadeiru Jenerál mós fó hanoin ba funsionáriu sira hotu atu hala’o preparasaun máximu ba loron FALINTIL ne’ebé sei monu iha 20 Agostu no mós ba vizita Santu Padre nian ne’ebé sei akontese iha fulan Setembru tinan ne’e.  

Partisipa iha serimónia Isar Bandeira Nasionál ba semana dahuluk fulan Juñu nian mak Diretór Jeral Rekursu Defeza, Sr. Martinho Soares Moniz, kargu xefia sira husi Ministériu Defeza, Xefe Gabinete no asesores sira, no F-FDTL sira iha Kuartél Jenerál Fatuhada.

Média MD