Ministériu Defeza Presta Omenajen ba Saudozu Mateus Brito Ximenes ‘Ateko’

Ohin, 04 Juñu 2024 – Ministériu Defeza reprezenta husi Diretora Nasionál Aprovizionamentu, Sra. Dília de Souza, Diretora Nasionál Rekursu Umanu, Sra. Maria Kolomia de Oliveira, Diretora Nasionál Administrasaun no Finansas, Sra. Isabel Bareto Soares inklui funsionáriu sira husi gabinete S. E. Ministru Defeza, presta omenajen ikus ba maktoban Saudozu Mateus Brito Ximenes iha nia rezidénsia Vila Verde, Díli.

Tuir kronolojia, Saudozu Mateus ho naran kódigu “Ateko” hakotu nia iis iha Hospital Nasionál Guido Valadares (HNGV), tanba afekta husi kilat musan ne’ebé militár indonéziu sira tiru iha akontesimentu Masakre Santa Kruz iha loron 12 Novembru 1991.

S. E. Ministru Defeza, Kontra-Almirante, Donaciano da Costa Gomes ‘Pedro Klamar Fuik’, Ph.D., iha ninia mensajen, hato’o nia kondolénsia profunda ba família enlutada, no hodi nia naran rasik, nia hato’o laran susar kle’an ba lakon amigu no kompañeiru da luta Saudozu ‘Ateko’ ne’ebé hala’o batalla iha rai laran no iha diáspora ba kauza libertasaun Timor-Leste nian.

Iha tempu rezisténsia, Saudozu Ateko inklina an iha Organizasaun Juventude Estudante Timor-Leste (OJETL) no fó mós nia kontribuisaun signifikativu ba kauza independénsia RDTL nian.

Maktoban Saudozu Mateus Brito Ximenes ‘Ateko’ hakotu nia iis iha loron 30 fulan Maiu 2024 no husik hela feen kaben ho oan nain haat.

Média MD