01 Fevereiru 2025 - S. E. Ministru Defeza, Kontra-Almirante Donaciano Costa Gomes 'Pedro Klamar Fuik', Ph.D, hala'o audiénsia ho nia homólogo Chefe Estado Maior General Forsas Armadas Portugés, Sr. José Nunes da Fonseca ho nia delegasaun hodi troka impresaun kona-ba dezenvolvimentu forsas armadas, iha edifísiu Ministériu Defeza Fatuhada, Díli.

Audiénsia refere hala'o iha ámbitu preparasaun ba selebrasaun Loron transformasaun FALINTIL ba F-FDTL ba dala-24 ne'ebé sei selebra iha Loron 2 fulan fevereiru 2025.

Hafoin remata enkontru, S. E. Ministru Defeza, Kontra-Almirante agradese ba disponibilidade husi CEMGFA Portugal ho nia delegasaun ne'ebé bele aseita konvite hodi mai partisipa loron transformasaun FALINTIL ba F-FDTL iha Díli.

Husi sorin seluk, CEMGFA portugés ne'e mós manifesta nia kontente tanba bele hetan konvite hodi hala'o audiénsia ho Kontra-Almirante Donaciano Gomes atual Ministru Defeza.

Xefe Estadu portugés ne'e mós hodi naran forsas armadas Portugés ho nia estrutura kongratula FALINTIL-FDTL ne'ebé iha dalan desizivu no progresu sira ne'ebé bele implementa ona iha área defeza, liu-liu ba bem-star nasaun nian iha futuru.

CEMGFA José Fonseca mós agradese wain ba disponibilidade no vontade kooperasaun entre forsa rua liu husi kooperasaun ne'ebé estabelese tiha ona.

Média MD