PENANG-MALÁZIA 26-02-2025 - S. E. Ministru Defeza Timor-Leste, Kontra-Almirante Donaciano do Rosário da Costa Gomes, Ph.D, hamutuk ho delegasaun Ministériu Defeza iha Tersa-Feira Loron 25 Fulan Fevereiru tinan 2025, hasoru malu ho nia homólogu Ministru Defeza Malázia Dato Seri Mohamed Khaled Bin Nordin hodi deskute kona-ba kooperasaun bilateral ne’ebé país rua estabelese ona.

Enkontru bilateral ne’ebé realiza iha Ótel Shangri-La Rasa Sayang Penang iha tuku 14:30 no remata iha tuku 15:00 ne’e hanesan parte ida husi agenda seluk ne’ebé Ministru Defeza Timor-Leste hola parte durante partisipa enkontru Ministru Defeza ASEAN, ne’ebé kuiñesidu ho asean Defence Ministerial Meeting Retreat (ADMM).

Ministru Defeza Kontra-Almirante Donaciano do Rosário da Costa Gomes haktuir, iha enkontru bilateral ne’e Malázia ne’ebé hanesan uma na’in ba enkontru ADMM, kontinua reiteira sira nia pozisaun hodi apoiu Timor-Leste adere ba ASEAN.

“Timor-Leste iha previleiju partisipa iha retiru ba Ministru Defeza sira, hodi prepara ba enkontru Ministru Defeza nian iha fulan Novembru tinan ne’e, no Timor-Leste hetan konvite hodi partisipa hanesan observadór. Enkontru bilateral ho Ministru Defeza Malázia, ne’ebé mak fó sira nia apoiu tomak, sei halo esforsu no promete tama ASEAN iha sira nia mandatu,”Haktuir Ministru Defeza ne’e hafoin remata enkontru ADMM iha Kuarta-Feira ne’e (26/02/2025).

Enkuantu, iha Kuarta-feira loron 26 Fulan Fevereiru, hafoin remata enkontru ADMM, iha parte loraik Ministru Defeza Kontra-Almirante Donaciano Do Rosário Da Costa Gomes realiza mós enkontru bilateral ho nia homólogu Ministru Defeza Repúblika Indonézia Sjafrie Sjamsoedin No Ministru Defeza Laos PDR Khamlieng Outhakaisone.

Hanesan mós ho Malázia, Ministru Defeza Kontra-Almirante Donaciano do Rosário da Costa Gomes afirma, Repúblika Indonézia no Laos PDR nudar estadu membru permanente ASEAN, hato’o pozisaun hanesan hodi kontinua esforsu nune’e Timor-Leste ne’ebé dadauk ne’e ho estatutu hanesan observadór, bele adere ba ASEAN iha tempu oin mai.

“Durante retiru, pais membru permanente la-halo avaliasaun kona-ba Ministériu Defeza ka área ou pilar defeza no seguransa nian rasik, atu oinsa mak bele halo adezaun ba ASEAN, maibé iha reuniaun bilateral ko’alia no sira rasik hatete katak, la-presiza atu husu deit ba Timor-Leste atu orienta tuir routemap ne’ebé iha, tamba naturalmente Timor-Leste iha prosesu ida kompleksu iha prosesu konstrusaun estadu no prefere atu integra Timor-Leste iha ASEAN/ depois no kontinua apoiu Timor-Leste ba dezenvolvimentu,”Ministru Defeza haktuir pozisaun Repúblika Indonézia no Laos PDR.

Antes termina enkontru bilateral ne’e, Ministru Defeza Kontra- Almirante Donaciano do Rosário da Costa Gomes ho nia homólogu sira, troka mós prendas nudar sentidu amigavel.

MÉDIA MD