Segunda-feira 03 fevereiru 2025 - S. E. Ministru Defeza, Kontra-Almirante Donaciano Costa Gomes 'Pedro Klamar Fuik', Ph.D, sai inspetór ba serimónia içar Bandeira ba semana dahuluk fulan fevereiru nian iha Quartel-General Fatu-Hada, Díli.

Iha nia diskursu, S. E. Ministru Defeza Donaciano Costa Gomes hateten katak, transformasaun forsa libertasaun nasionál ba forsa moderna ida ne'ebé hanaran F-FDTL. Transformasaun komponente Estadu ida ne'e halo parte iha prosesu konstrusaun Estadu no nasaun nian iha Estadu Direitu demokrátiku.

Hanesan Estadu direitu demokrátiku presiza iha-nia autoridade tan ne'e presiza iha forsas armadas moderna ida ne'ebé bele adapta ba dinámika Estadu nian hodi nune'e bele asegura espasu soberania teritoriál husi rai maran, husi tasi nune'e mós husi lalehan.

Kontra-Almirante ne'e mós husu atu forsas armadas tenki iha obediénsia ba poder Estadu ne'ebé demokratikamente eleitu atu nune'e bele kumpri missaun tuir responsabilidade ne'ebé atribui konstitusionalmente husi Estadu Timor-Leste.

S. E. Ministru Defeza subliña liu tan katak forsas armadas iha responsabilidade boot perante Estadu no perante povu tuir legitimidade ne'ebé nia konkista husi nia maneira organizasaun no dezempeñu ba nia missaun.

Partisipa iha serimónia Içar Bandeira Nasional refere mak Funsionáriu sira husi Ministériu Defeza no Estrutura komandu ne'ebé destaka iha Quartel-General Fatu-Hada.

Média MD