S. E. Ministru Defeza, Kontra-Almirante Donaciano da Costa Gomes 'Pedro Klamar Fuik', PhD, partisipa no sai oradór ba retiru ne'ebé organiza husi FALINTIL- Forsa Defeza Timor-Leste (F-FDTL), ne'ebé realiza iha Centro Instrusaun Comandante Nicolau Lobato, Metinaro.

Retiru ida ne'e ho objetivu atu reflete kona-ba Loron Nasionál Veteranu ba dala-VIII ne'ebé tuir kalendáriu Nasionál selebra iha Loron 3 fulan Marsu kada tinan, hodi reflete liu-liu kona-ba valores uniaun no kamaradajen husi Aswa'in sira nian iha prosesu kontrusaun Estadu no nasaun nian.

Temátiku ne'ebé reflete hamutuk iha retiru ne'e maka: 'Prezerva espíritu reziliénsia no uniaun veteranu sira nian' ne'ebé lori husi General Taur Matan Ruak. 'Reforsa lasu fraternidade entre veteranu sira husi FALINTIL: hamoris valor étiku no solidariedade hodi transmiti ba gerasaun foun sira' ne'ebé lori husi General Reformadu, Lere Anan Timur.

Iha intervensaun, S. E. Ministru Defeza Donaciano Gomes hateten katak, veteranu hanesan perkursu moris nian ida husi juventude sira ne'ebé iha passadu dedika sira nia vida ba kauza komún ida ba libertasaun pátria. No ohin termu veteranu hanesan identidade ida ne'ebé Estadu atribui própriamemte ba ita-nia guerilleiru mane no feto ne'ebé fó sira nia vida ba kauza justa ida.

"Ita presiza hanoin bei-beik katak, veteranu mak juventude loriku Aswa'in sira ne'ebé iha passadu fó sira nia vida hodi halo sakrifísiu hotu-hotu hodi partisipa no dedika sira nia vida tomak ba kauza libertasaun nasionál hodi serve de'it ba pátria no bem-comum Estadu nian. Ne'e mak papel juventude iha passadu hodi konstitui veteranu iha presente ho nia legadu sira ne'ebé sasukat laek, nasaun livre no independente, no kontinua tulun nia jerasaun foun sira atu konstrói mehi ba Timor foun ida, jardín ba ema hotu, no nasaun ida ne'ebé garante paz ba nia sidadaun sira", hateten Ministru Defeza, Kontra-Almirante Donaciano da Costa Gomes durante retiru.

Kontra-Almirante Pedro Klamar Fuik mós husu ba veteranu sira atu demonstra afektu ba gerasaun foun sira liu husi investimentu finanseiru, formasaun umana, sosial no psikolójiku atu jerasaun foun sira iha otimizmu no esperansa, auto-konfiansa, reziliente no kreativu liu tan hodi dezenvolve Timor-Leste ba nasaun ida ne'ebé prósperu no hakmatek ba nia sidadaun sira.

Durante diskusaun, veteranu sira mós aproveita oportunidade hodi sujere ba S. E. Ministru Defeza atu bele elabora lei protesaun no bem-estar ba veteranu sira husi FALINTIL ne'ebé sei ativu iha instituisaun F-FDTL, tanba tuir polítika governu nian, pessoal sira ne'ebé atinji ona tinan 60 obrigatoriamente ba reforma. No sira ne'ebé to'o ona idade 55 sei passa ba rezerva.

Hanesan membru governu no alin ida husi guerilleiru sira, S. E. Ministru Defeza, Kontra-Almirante Pedro Klamar Fuik agradese ba sujestaun no ideia sira husi pioneiru FALINTIL-FDTL no sei aprezenta ezbosu lei reforma militár ba Konsellu Ministru iha semana tuir mai.

Média MD