Durante intervensaun, S. E. Ministru Defeza Donaciano Gomes hateten katak "General CEMGFA iha objetivu estratéjiku rua ne'ebé nia defini iha nia mandatu: ida mak profisionaliza forsas armadas. No ida seluk mak, moderniza forsas armadas. Tan ne'e mak hanesan Ministru Defeza buka konstantemente hodi fó apoiu hotu-hotu ba militár sira bainhira sira ba kumpri missaun ba Estadu".

Kontra-Almirante Pedro Klamar Fuik subliña katak, iha prosesu de transformasaun dalaruma ita haluha tiha nesesidade básiku hodi haluha organiza ita-nia uma laran, liu-liu ita-nia konfortu no bem-star. Tanba ne'e mak Ministru Defeza enfatiza atu kada organizasaun, organiza uluk nia uma laran no hakbiit funsionamentu ba kadeia komandu atu militár sira bele kumpri missaun ne'ebé Estadu atribui ba sira.

Husi sorin seluk, General CEMGFA, Falur Rate Laek agradese ba Ministru Defeza ho estrutura husi Ministériu nian ne'ebé buka konstantemente kolabora ho Instituisaun forsas armadas hodi bele moderniza no profisionaliza forsas armadas iha aspetu hotu hanesan militár no hanesan sidadaun ida.

Tenente General ne'e mós husu ba estrutura F-FDTL, liu-liu ba komandante Komponente sira atu kuida sasan sira ne'ebé Estadu atribui ba Instituisaun F-FDTL hodi bele kumpri missaun ho diak no kuida mós fasilidade sira ne'ebé Estadu fó hodi garante militár sira nia bem-star bainhira kumpri missaun hotu iha liur.

Apoiu sira ne'ebé ohin entrega mak hanesan: spring bad unidade (3000 mil) no sumasu, kompostu ho froñas ba kada unidade. No Sasan hirak ne'e fornese husi Kompaña Monguba Double J. Unipessoal, Lda.

Partisipa iha serimónia entrega ekipamentu ne'e mak: Ministru Defeza Kontra-Almirante Donaciano da Costa Gomes, Ph.D., Tenente-General Domingos Raul 'Falur Rate Laek' ho nia estrutura, kompostu husi Komandante Komponente sira; Funsionáriu husi Ministériu Defeza nian.

Média MD