Ministru Defeza Sai Orador ba Retiru Futuru Lideransa F-FDTL
Ohin, tersa-feira 15 abril 2025 - S. E. Ministru Defeza, Kontra-Almirante Donaciano Costa Gomes 'Pedro Klamar Fuik', Ph.D, partisipa iha Retiru ne'ebé organiza husi Xefe Estadu-Maior-General F-FDTL, Tenente-General Domingos Raúl 'Falur Rate Laek' ho temátiku: "Perspetivas de Liderança Futuras nas F-FDTL", iha Komponente Forsa Terrestre Lanud, Baucau.
Objetivu husi retiru ne'e mak dezenvolve kompeténsia lideransa iha área komunikasaun, pensamentu krítiku, kapasidade atu foti desizaun, kapasidade ba rezolusaun konflitu no kapasidade nesesáriu sira ne'ebé lideransa F-FDTL iha futuru tenki konstitui iha nia an.
Objetivu seluk mak ofisiais superiores no futuru lideransa F-FDTL sira halo análiza narativa ba geo-polítika no geo-estratéjika ba pozisaun Timor-Leste nian ligadu ho área defeza iha nível rejionál no globál hodi nune'e bele asegura liu tan soberania Timor-Leste nian hanesan país independente ida.
Iha biban ne'e, S. E. Ministru Defeza Donaciano Gomes, Ph.D, sai mós oradór ba retiru refere hodi partilla kona-ba "karakterístika nesesária sira ba lideransa iha F-FDTL perante seguransa rejionál no global iha sékulu XXI: ho perspetiva tranzisaun jerasional".
Durante intervensaun, Kontra-Almirante halo mós narativa histórika hodi reflete hamutuk ho Ofisiais Superiores sira husi F-FDTL, kona-ba konjuntura polítika mundiál ne'ebé akontese desde 2° Guerra Mundiál to'o iha finál Guerra Fria no oinsá país sira ne'ebé iha podér impoen nia hakarak ba país médiu no kiik sira liu husi domínio iha área militár nian.
Oradór mós iha retiru refere mak: Dr. Avelino Coelho, ho kualidade hanesan Antigu kolaboradór Estadu-Maior FALINTIL, no Líder Brigada Negra; Eis-Ministru Defeza, Komandante José Agostinho Sequeira 'Somotxo'.
Média MD