Durante serimónia entrega, Vise-Xefe Estadu Maijor Calisto dos Santos 'Koliati', iha nia diskursu hateten katak, serimónia ida ne'e marka pasu importante ida ba Komponente Aéreo no ba parseria diak entre Estadus Unidos América ho Timor-Leste.

Vise-CEMGFA ne'e subliña liu tan katak "ho serimókia entrega ida ne'e la'os de'it inagurasaun ba infrastruktura físika, maibé nu'udár símbolu ida kle'an ba kooperasaun entre Estadus Unidos América ho Timor-Leste, iha ne'ebé sei fasilita liu tan kapasidade operasionál ba Komponente Aéreo iha nia missaun lor-loron ne'ebé Estadu atribui ba nia atu kumpri."

Husi sorin seluk, Xefe Guarda Nasionál, Ministériu Defeza Estadus Unidos América, Jenerál Steven Nordhaus mós afirma katak, ho fasilidade hirak ne'e sei hasa'e liu tan kapasidade F-FDTL nian hodi bele atende diak liu tan dezastre no prontidaun operasionál hodi reforsa Timor-Leste nia reziliénsia no seguransa.

Jenerál Steven Nordhaus mós salienta katak, vizita refere reafirma parseria forte no buras entre Estadus Unidos América no Timor-Leste, tan ne'e mak nia husu ba forsa americanu sira ne'ebé destakadu iha Timor-Leste atu serbí ho orgulho no ónra ba kompromisu hamutuk entre Estadu rua iha kooperasaun defeza hodi garante paz no estabilidade iha rejiaun no iha mundu.

Partisipa iha serimónia refere mak Sekretáriu Estadu Protesaun Sivil, Sr. Domingos Mariano Reis, Prezidente Autoridade Município Baucau, Dra. Veneranda Lemos, Autoridade Sivil no Militár husi F-FDTL.

Média MD