Ministru Defeza Timor-Leste Kontra-Almirante Donaciano do Rosário da Costa Gomes “Pedro Klamar Fuik”, Ph.D., hamutuk ho Ministru Defeza Malázia Datuk Seri Mohamed Khaled Nordin asina nota entedimentu hodi haforsa kooperasaun biliterál Timor-Leste no Malázia iha dominiu Defeza nian.

Nota kooperasaun ne’ebé mak Ministru Defeza Timor-Leste Kontra-Almirante Donaciano do Rosário da Costa Gomes “Pedro Klamar Fuik”, Ph.D., ho nia omólogu Ministru Defeza Malázia Datuk Seri Mohamed Khaled Nordin asina ne’e foku liu ba iha instrumentu juridiku iha dominiu Defeza nian ne’ebé foku ba buat haat mak hanesan; dialogu no estratejia regulár, reforsa kapasidade F-FDTL no forsa Malázia, oinsá militár rai rua ne’e hametin kooperasaun iha area dominiu defeza nian liu husi interkambiu, siensia teknólojia no industria defeza.

Akordu kooperasaun entre Timor-Leste no Malázia iha área Defeza asina hafoin reuniaun Ministru Defeza ASEAN nian ba dala-19 ne’ebé halao iha Kuala Lumpur Malázia sesta (31/10) horseik.

Ho nune’e, kooperasaun bilaterál entre Timor-Leste no Malázia iha dominiu defeza ne’ebé foku ba instrumentu juridiku ne’e reflete ba iha ba polítika kooperasaun Timor-Leste nian.

Kooperasaun ne’ebé mak Ministru Defeza Timor-Leste Kontra-Almirante Donaciano do Rosário da Costa Gomes “Pedro Klamar Fuik”,Ph.D., ho nia omólogu Ministru Defeza Malázia Datuk Seri Mohamed Khaled Nordin nudar kooperasaun dahuluk iha dominiu Defeza nian , hafoin Timor-Leste sai membru plenu direitu ba ASEAN foin lalais ne’e.

Média MD.