Governo Portugal Kontinua Apoiu Timor-Leste iha Área Dezenvolvimentu Forsa Defeza

Dili: Ministru Defeza Portugal, Dr. José Alberto Azeredo Lopes hato’o parabéns no kumprimentus bá Ministru Defeza Timor-Leste Birgadeiro Jeneral Filomeno da Paixão de Jesus, liu husi karta ne’ebé entrega husi Adjuntu-Xefe Misaun Diplomátiku  no Konselleru Ambaixada Portugal iha Timor-Leste, Sr. João Pedro de Noronha Brito Câmara. Sorumutuk ne’e hala’o iha loron 5 Agusto 2018, iha Idifisiu Ministériu Defeza Fatuhada, Dili.

Durante iha inkontru refere, parte rua Timor-Leste no Portugal iha kompromisu atu hametin liután relasaun bilateral iha setór defeza. Ministru Defeza Timor-Leste aproveita enkontru refere hodi agradese bá Governo Portugal, liuliu bá apoiu tomak durante ne’e no sei kontinua hametin liután relasaun bilateral iha área defeza entre país rua.

Portugal nu’udár nasaun ida ne’ebé iha mós komitmentu bo’ot hodi dezenvolve F-FDTL hahu kedas husi tinan 2001. Ministro Defeza Brigadeiro Jeneral Filomeno da Paixao de Jesus afirma katak, “Apoiu no solidaridade Governo Portugues bo’ot tebes. Desde inísiu, Governo Portugal hahu apoiu formasaun bá estabelesementu F-FDTL no forsa terestre. Nune’e, Portugal hahu apoiu forsa Naval hodi fó roo patrullamentu rua inklui formasaun ba kadetes Naval F-FDTL sira”.

“Governo Portugues mós fó apoiu bá formasaun no kapasitasaun bá nivel ofisial iha Portugal, inklui mós formasaun iha Metinaro. Iha kontestu estratéjiku nian, iha mós kooperasaun no apoiu tékniku bá Ministériu Defeza liu husi peritus militares hodi apoiu planu dezenvolvimentu forsa defesa”, tenik Ministro Defeza ne’ebé remata nia kursu jenerais iha Lisboa Portugal iha tinan 2011.

Tanba ida ne’e, Portugal nu’udár parseiru ida importante tebes ba Timor-Leste. La’os deit tanba ligasaun istória maibé mós tanba konfiansa, amizade no solidaridade ne’ebé aas husi Governo Portugues ba povu Timor-Leste. Ministro Defeza reafirma katak, nia esforsu atu kontinua estabelese kooperasaun diak ho Governo Portugal, liuliu área hirak ne’ebé liga ba dezenvolvimentu forsa defeza. (Med)

Deskulpa - Komentariu ami Taka

error: Content is protected !!