Ministru Defeza Aprezenta Alokasaun OJE 2018 Bá PN Komisaun B

 

DILI: Ministru Defeza (MD) Brigadeiro Jeneral Filomeno da Paixão de Jesus aprezenta alokasaun Orsamentu Jeral Estadu 2018 (OJE) bá Parlamentu Nasionál liu husi komisaun B trata assuntu Defeza no Seguransa. Orsamentu Jeral ne’ebé Ministériu Defeza hetan alokasaun orsamentu ho montante tokon U$.20,610.

Báinhira atu tama bá iha debáte Orsamentu Jeral Estadu 2018 (OJE) ne’ebé ajenda ona katak iha loron 28-29 sei halao debáte komesa husi jeneralidade no loron 31 Agostu hahu debáte espesialidade ho durasaun loron lima (5), antes ne’e iha uluk ona audénsia públika entre komisaun espesializada permanente ho Ministériu relevante sira hodi halo klarifikasaun bá alokasaun OJE 2018 nian.

Ministru Defeza Brigadeiro Jeneral Filomeno da Paixão de Jesus hatete, nia mai esplika kona-bá OJE 2018 nune’e mós informa orsamentu Setembru bá kotuk no Setembru bá oin to Dezembru 2018, nune’e mós nia mai aprezenta kona-bá planu saida mak atu halo, nune’e komisaun B tenke hatene hodi apar nune’e bele aprova no bálun  bele hadia.

“Ita mak dehan orsamentu ne’e bá periodu fulan haat (4), maibé periodu atu bá halo realizasaun no implementasaun orsamentu ne’e fulan rua de’it no laiha buat bárak atu halo ita atensaun liu mak bá iha bens serbisus no bá kapital menor laiha, sei tau atensaun bá iha bens estar forsas nian nune’e mós tau matan bá iha dividas bálun ne’e mak hanesan kombustivel, manutensaun no hahan,”dehan Ministru Defeza bá jornalista sira báinhira remata inkontru iha salaun Komisaun B iha Parlamentu Nasionál Kuarta-Feira (15/08/2018).

Ministru Defeza ne’e dehan, ho orsamentu ne’e sei tau atensaun bá iha bens estar forsas nian nune’e mós tau matan bá iha dividas bálun ne’e maka hanesan kombustivel manutensaun hahan.

 

Kobertura: Ligia Noronha

Deskulpa - Komentariu ami Taka

error: Content is protected !!