Koronél Coliati Simu Pose

DILI: Koronél Calistro dos Santos alias “Coliati” iha Segunda-Feira 29 Outubru 2018 simu pose husi Prezidente Repúblika S.E Francisco Guterres Lú-Olo nu’udar Xefe Estadu Maiór FALINTIL- Forsa Armada (XEMFA) iha Palásiu Prezidensiál Báiro Pite, Dili.

Iha diskursu, Prezidente Repúblika enkoraja Koronel Coliati atu kontribui bá Forsas Armadas hodi dezenvolve no moderniza instituisaun F-FDTL no tane aas nafatin espíritu, valores no determinasaun  FALINTIL sira-nian hodi la’o bá oin. Ho laran-hakmatek no determinadu, hodi firmi no kaer metin interese nasaun nian, asegura Instituisaun Militár nia diresaun no lala’ok ho di’ak.

“Ita presiza duni atu prienxe kargu Xefe Estadu Maiór ne’ebé Brigadeiru Falur Rate Laek husik mamuk hela báinhira nia simu knaar nu’udar Vise Xefe Estadu Maiór Jeneral Forsa Armada. Ha’u felisita Koronél Coliati tanbá simu pose atu kaer kna’ar importante tebes ida,” dehan Xefe Estadu iha nia diskurusu bá serimónia tomada de Pose.

Xefe Estadu ne’e dehan, Señór Koronél “Coliati” hatudu kualidade pesoál, téknika no profisionál no mós virtude militár durante nia karreira tomak atu serbí bá Instituisaun Militár no nasaun, tanbá ne’e ho kualidade sira ne’e hotu mak sai fatór determinante bá ninia nomeasaun, nu’udar Xefe Estadu-Maior.

Iha fatin hanesan Xefe Estadu Maiór F-FDTL, Kolonél Calistro dos Santos “Coliati”, hatete, nu’udar sidadaun no militar sente haksolok tebes ho konfiansa ida ne’e. Maibé kna’ar ida ne’e mós todan ho responsabilidade ne’ebé bot. Hanesan Xefe Estadu Maiór Jeneral rasik fó hatene ona katak hahú ohin, ita hahu istória foun, tanba jerasaun tuan hahu fó fiar instituisaun militar F-FDTL bá jerasaun foun nia liman.

“Kargu foun ida ne’e hanesan dezafiu foun ida iha mai ha’u iha karreira militar. Ha’u mós jerasaun pionér ne’ebé hahú prosesu funu ne’e, maibe ha’u la kompleta ha’u nia prejensa iha gerilla hanesan veteranus iha tinan 24”, tenik Coliati.

Maske Kolonél Coliati la kompleta funu tinan 24 iha ai-laran, iha momentu ne’ebá, bainhira báze-de-apoiu Fronteira Norte rahun, Kolonél Coliate tun mai sidade hodi hala’o fila-fali nia misaun iha frente klandestina hahu tinan 1984 to’o 1996 hanesan Coordenador ODIR. Iha tinan 1997, Coronel Koliate hetan fiar husi Comando da Luta no fila fali bá ai-laran hodi assume kargu hanesan Vise Sekretáriu Rejiaun IV hodi responsabiliza bá asuntu polítika no militar iha parte unidade Fronteira súl.

Kona-bá Vizaun hanesan XEMFA, Coronel Coliate hatete katak, iha ona planu estratéziku 2020. Planu ida ne’e hahu implementa hahú implementa iha tinan 2007 mai to’o agora. Ba oin, F-FDTL sei kontinua kaer nafatin bá planu 2020 to’o halo nia revizaun estratéjiku. Iha nivel polítika, sei koordena ho Ministério Defesa hodi haree no reve planu estratéjiku militar bá oin, liuliu revizaun Forca 2020 no Planu estratéjiku foun ba tinan 2020-2030.

Maski nune’e, Coronel Coliate afirma katak, nia sei kontinua desenvolve serbisu ne’ebé XEMFA Brigadeiru Falur Rate Laek halo ona, liuliu iha parte administrasaun no lojístika. Atu nune’e serbisu sira ne’e bele iha nia kontinuasaun to’o atinji finalidade ida.



Kobertura:Ligia Noronha/Gil Barros

Deskulpa - Komentariu ami Taka

error: Content is protected !!