Austrália Konvida MD Haree Direita Ró Patrulla

AUSTRALIA: Governu Austrália liu husi Ministru Defeza Austrália señor Honroso Cristopher Pyne konvida direita Ministru Defeza no Ministru Interior Interinu Brig-Gen (Ref) Filomeno da Paixão de Jesus, hodi haree direita ró patrulla rua ne’ebé sei oferese ba Timor Leste hodi halo kontrolasaun ba área tasi nian.


Ministru ho delegasaun vizita kompañia Austal iha sidade Perth hanesan fatin ne’ebé harii ka konstroi ró patrullha rua Guardian Class Patrol Boat (GSPB), governu Australianu fó ka oferese ona ba Timor-Leste. Durante vizita iha Austal, autoridade no enjinéiru sira kompañia refere halo aprezentasaun kona-bá perfile kompañia nian no liliu hodi esplika téknikamente kona-bá kbiit ka vantajen husi ró GCPB ne’e.

Iha aprezentasaun ne’e, Austal esplika kona-bá kapasidade ka kbiit husi ró GCPB ne’ebé bele halo operasaun Ka patrulla iha teritóriu marítima Timor-Leste nian liliu iha tasi mane nian. Austal nu’udar kompañia ne’ebé koñesidu iha mundu tambá ninia esperiénsia no kualidade produtu ró ho tipu no klase oioin ne’ebé nia produs ba país oioin iha mundu. Iha inkontru entre Ministru Defeza Australia no no Ministru Defeza TL troka hanoin no idea kona-bá kestaun oioin husi nível bilateral, rejional no global nian.

S.Exa Ministru Defeza Timor-Leste hahú nia intervensaun hodi hato’o apresiasaun kle’an ba governu no povu Australianu ne’ebé kontinua fó apoiu tomak ba esforsu dezenvolvimentu nasional Timor-Leste nian. Ministru Defeza TL informa, kona-bá prioridade programa VIII Governu Konstitusional nian iha área defeza, nomós partilla kona-bá ameasa ne’ebé Timor-Leste enfrenta agora no ba futuru, hato’o mós hanoin kona-bá konjuntura polítika iha nível rejiaun no mundu nian liliu kona-bá rejiaun Indo-Pasífiku no importánsia atu adere ba ASEAN husi aspetu defeza no seguransa nian. Tanba Indo-Pasífiku sai nu’udar rejiaun ida ne’ebé iha poténsia boot tebtebes iha mundu, tanbá ne’e importante tebtebes atu asegura katak rejiaun ne’e estável, bazeia ba regra, livre no nakloke ba país hotu. Importante tebtebes atu kria no mantein paz no estabilidade iha rejiaun Indo-Pasífiku no mundu tomak no kuda no hametin kultura dame nian. Iha fatin hanesan Ministru Defeza Austrália, hato’o agradesimentu ba vizita husi ninia homólogu ne’e no koalia kona-bá importánsia husi relasaun bilateral entre Timor-Leste ho Austrália, relasaun ida ne’ebé istóriku no emosionál entre povu no nasaun rua.

Tuir Ministru Defeza Australia ne’e katak, Austrália iha kompromisu atu kontinua hametin liután relasaun bilateral no esplora nafatin área koperasaun oioin ho Timor-Leste. Iha inkontru ne’e, Ministru rua konkorda atu kontinua hametin relasaun iha área defeza no liliu konkorda katak parte rua Timor-Leste no Austrália sei diskuti iha nível tékniku no operasional nian kona-bá preparasaun sira ne’ebé parte rua tenki halo molok Timor-Leste simu ró rua ne’e iha tinan 2023. Ho nune’e parte rua konkorda katak, preparasaun ba prontidaun ne’e tenki kompriensivu no iha pakote.

Durante ne’e Austrália fó formasaun oioin ba F-FDTL Komponente Naval nian, ba oin parte rua sei intensifika liután preparasaun kapasitasaun inklui preparasaun ba infrastruturu atu nune’e bainhira Timor-Leste simu ró rua ne’e, Timor-Leste iha ona kbiit no prontu atu halo operasaun ba ró rua ne’e hodi bele asegura teritóriu marítima Timor-Leste nian. Vizita ne’e akompañadu husi Adidu Defeza Timor-Leste ba Austrália, Coronel Trix, Assessor no Ofisial husi Ministériu Defeza Timor-Leste hahú husi loron Sabdu 16 to’o Kinta-Feira 21 Marsu 2019.

Kobertura: Gil Barros

Deskulpa - Komentariu ami Taka

error: Content is protected !!