MD Kongratula Nasaun China Ba Apoiu Tomák Iha TL

DILI: Embaixadór China iha Timor Leste komemora loron libertasaun armada popular China ba dala 92, hodi konvida direita Ministru Defeza no Ministru Interior Interinu Brigadeiru Jenerál (Ref) Filomeno da Paixão de Jesus hodi partesipa iha serimónia refere, tanba ne’e Ministru kongratula ba apoiu tomák ne’ebé fó ona ba Timor-Leste.

Liu husi diskursu badak Ministru Defeza no Ministru Interior ne’e hatete, iha oportunidade ne’e hakarak kongratula mós ezersitu nasionál povu China tomák, no hein katak nasaun rua (2) ne’e kontinua koopera hamutuk nafatin.

“Tanba ita hotu hatene relasuan bilaterál ho Xina abranje ona iha área barak hanesan, saude, edukasaun, Defeza no seguransa. Hanesan iha área Defeza nian, ami nia forsa kontinua aprende ho Governu China atu bele sae forsa ida profisionál,”dehan Ministru bainhira partesipa serimónia ne’e iha resintu Embaixada China iha Timor Leste Aitarak Laran, Kinta-Feira (25/07/2019).

Governante ne’e hatete, Governu Xina mós apoiu pesoál sivil sira iha Ministériu Defeza hodi ba estuda iha Xina no balu fila mai ona hodi fahe sira nia matenek iha ne’e, tanba ne’e governu liu husi Ministeriu defeza kontinua buka parseria atu reforsa área defeza.

Tanba  antes ne’e, Timor-Leste nia infraestrutura kuaze estragu barak, maibé atravez nasaun parseria sira hanesan  China, Estadus Unidus Amérika ho Japan, nomós nasaun membru CPLP konsege restaura hikas situasaun ida ne’e ho lais. Ho nune’e nia mos husu atu kontinua hametin nafatin relasaun ida ne’e iha kontekstu governu Xina.

Iha fatin hanesan Adidu Defeza Xina Koronél Huang Da Min hatete, agradese nafatin ba kooperasaun durante tinan barak nia laran. Ohin kalan hamutuk iha ne’e hodi Selebra loron importante ida ne’e.

Loron ida ne’e nia papel importante iha istória Xina nian, hahú kedas husi komando Partido Komunista China ne’ebe lidera husi povu no ikus konsege ba libertasaun nasionál.

“Ami ne’ebé ohin kalan hamutuk ho ita bo’ot sira iha ne’e, lori governu Xina nia naran hakarak hato’o ami nia agradese barak  ba kooperasaun tomák ne’ebé durante ne’e ita halo ona. Tanba ne’e, ami nia sei mantein nafatin halo serbisu hamutuk hodi promove forsa Defeza Timor-Leste nian iha future,”tenik Adidu ne’e.

Seremónia ne’e hetan partisipasaun husi Komandante F-FDTL Maijór Jenerál Lere Anan Timur, Komisáriu Polísia Julio da Costa Hornay, embaixadores, ofisial diplomata, Almirante ofisiais naval sira, inklui ofisiais forsa defeza no PNTL nian.

Kobertura: Ligia Noronha/Gil Barros

Deskulpa - Komentariu ami Taka

error: Content is protected !!