TL-Nova Zelándia halo Inkontru Anual Programa Asisténsia Iha Área Defeza

Ohin Tersa-feira 27 Agostu 2019, Timor-Leste no Nova Zelándia hala’o inkontru annual bilateral defeza  iha Ministériu Defeza, Fatuhada Dili.

Iha inkontru anual refere, parte rua Timor-Leste no Nova Zelándia diskuti hamutuk kona-bá programa asisténsia entre país rua iha setor defeza nian.

Iha inkontru refere, Xefe Estadu Maiór F-FDTL Col. Calisto Santos Coli ‘Coliati’ lori Komandu F-FDTL nian naran hato’o agradesimentu kle’an ba governu no forsa defeza Nova Zelándia nian ne’ebé durante ne’e kontinua fó apoiu ba Timor-Leste iha setor defeza.

Diretor-Geral ba Polítika Defeza no Koperasaun Internasional Ministériu Defeza Timor-Leste, Señor Martinho Maia Gonçalves mos hato’o agradesimentu ba apoiu no kompromisu tomak husi governu Nova Zelándia nian mai Timor-Leste.

Xefe Delegasaun Nova Zelándia, CMG Shaun Fogarty apresia mos parseria no koperasaun diak husi Timor-Leste. Nova Zelándia komprometidu atu fó apoiu nafatin ba Timor-Leste iha área defeza nian depende ba nesesidade no prioridade Timor-Leste nian.

Delegasaun Nova Zelándia nian informa ba Timor-Leste katak Nova Zelándia prontu no komprometidu atu fó apoiu nafatin ba Timor-Leste iha área sira hanesan seguransa marítima, manutensaun da paz, aprovizionamentu, língua Ingleza. Nova Zelándia mos sei fó apoiu formasaun ka kapasitasaun ba funsionáriu sivil iha Ministériu Defeza Timor-Leste nian.

Média MD

Deskulpa - Komentariu ami Taka

error: Content is protected !!