Ministru Defeza Husu PNTL Respeita Direitus Umanus

DILI: Ministru Defeza no Ministru Interior Interinu Brigadeiru Jenerál (Ref) Filomeno da Paixão de Jesus husu ba iha Polísia Nasionál Timor-Leste (PNTL) atu respeita direitus umanus, tanba polísia nia funsaun atu halo prevensaun laos utiliza forsa hasoru komunidade.

“Iha ne’e ba oin PNTL sira tenke implementa direitus umanus kumpri to’o kra’ik ida ne’e hanesan pasu di’ak ida nune’e iha mudansa, ita lori ita nia polísia hodi besik ba komunidade, Lia hirak ne’e hato’o liu husi deskursu S.E Ministru Defeza no Ministru Interior interinu bainhira loke serimónia semináriu Nasional ne’ebé realiza husi PDHJ iha Timor Plaza Salaun Suai-Room Tersa-feira (24/09/2019).

Instituisaun PDHJ tuir Ministru Defeza no Ministru Interior ne’e haree katak, provedoria  ne’e reprezenta forsa bo’ot ida ba protesaun populasaun nian, haree ba iha violasaun direitus umanus iha Timor laran tomák.

Governante ne’e akresenta, koalia kona-ba liberdade no demokrasia ne’e polísia nia parte, husi sidadaun ne’e mak valores ne’ebé fó sai iha Timor ne’e mak sai husi povu sei fila fali ba povu ho nune’e iha atuasaun ruma bele hatene ona oinsá atu regula.

“Ha’u haree ema barak iha Polísia hakarak serbisu hatudu ezemplu di’ak, maibé iha ema ida rua mak hakarak estraga tanba ne’e ita labele jeneralija PNTL, forsa polísia ruma mak halo asaun tenke foti prosesu kedan labele taka matan no tenke iha asaun komando nune’e ema bele respeita Polísia,”tenik S.E Ministru Interior interinu ne’e.

Iha fatin hanesan Provedoria Diretus Humanus no Justisa sra.Jesuina Maria Fereira Gomes hatete, PDHJ nu’udar instituisaun independente ne’ebé iha mandatu rua (2) promove no proteje direitus umanus no promove governasaun di’ak.

 PDHJ nia dezempenha nia funsaun iha ambitu atu defende povu sira nia diretus umanus iha ámbitu ba iha entidades públika sira inklui PNTL, F-FDTL no serbisu prijonál nian.

“Ha’u hanoin forsa PNTL atu halo prevensaun ba krimi tenke ba respeita direitu umanus, tanba atu garante serbisu PNTL hanesan entidades estadu iha dever atu respeita no proteje fundamental ema idak idak nian no atu asegura katak membru PNTL sira halao knaar iha terenu tuir duni lei,”haktuir Provedoria ne’e.

Iha semináriu Nasionál ne’e hetan partisipasaun husi estrutura PNTL no F-FDTL, Sosiadade Sivil inklui mós organizasaun feto nian.

kobertura Ligia Noronha/ Gil Barros

Deskulpa - Komentariu ami Taka

error: Content is protected !!