Ró Naval Qi-Jiguang Mai Vizita TL

DILI: Ró Akademia Naval Qi-Jiguang mai vizita Timor –Leste iha ámbitu selebra loron aniversáriu Repúblika Popular Xina nian ba dala 70. Ró Akademia Naval sei para iha Timor durante loron tolu nia laran hodi fó oportunidade ba Forsa Naval atu ba vizita hodi aprende buat ruma iha Ró refere.

Ministru Defeza no Ministru Interior Interinu Brigadeiru Jenerál (Ref) Filomeno da Paixão de Jesus hatete, sira husu autorizasaun ba governu atu mai vizita no forsa naval Timor-Leste sira mós bele ba halo vizita hodi haree no aprende buat balun, nune’e mós ba populasaun sira bele mai vizita hodi haree buat balun iha laran,tanba sira lori teknolojia ne’ebé aas haree hodi aprende.

“Vantazem husi vizita ró Qi-Jiguang ne’e barak tebes tanba ita nia forsa na’in 18 mak aprende ona iha academia naval ne’eba nian no agora dadaun ita iha kadetas ida mak sei aprende hela iha ne’eba,ita nia relasaun ho Xina dia’k tebes” dehan Ministru Defeza liu husi entervista ho jornalista sira bainhira halo vizita ba ró refere iha Portu Dili, Segunda-feira (7/10/2019).

Ministru Defeza haktuir liután, ró akadémia ne’e  bele akumula ema too atus lima (500) no iha ró laran kadetas sira besik atus rua (200) ne’ebé tuir aula prátika iha ró laran.

Aleinde ne’e Ministru defeza akresenta, kona-ba atu aplika militár obrigatoriu ne’e gasta osan boot, tanba ne’e laos governu mesak mak deside maibé lori ba Parlamentu Nasionál no Prezidente Repúblika hotu-hotu tenke invole hotu mak bele haree ba ida ne’e asuntu ne’e.

“Ha’u hanoin ba futuru lolos presiza ida ne’e tanba joven sira kompara ho uluk tempu Portugal nian hakiak ho sidade portuguesa kikoan kedan aprende ona valores patriotizmu, tanba ne’e mak presiza tebes maibé la’os de’it área forsa nian bele mós área seluk,”tenik Ministru.

Ró naval ne’e viazem husi Brunei liu mai iha Timor-Leste depois sei kontinua ba  Novazelandia sei ba tan rai seluk iha sub-pasifiku.

Ohin estrutura Defeza no estrutura F-FDTL ba hatoo komprementa boas vindas simu ho dansa kultura husi grupu Lezeval no kultura Xina nian, depois hala’o vizita direita ba ró laran hodi haree ekipamentus ne’ebe uza teknolojia aas, tanba ne’e Xina fó oportunidade ba komunidade sira bele mós ba halao vizita.

Kobertura: Ligia Noronha/ Gil Barros

Deskulpa - Komentariu ami Taka

error: Content is protected !!