MD Simu Vizita Kortezia Husi Embaixadora Rússia

DILI: Ministru Defeza no Ministru Interior Interinu Brig-Gen (Ref) Filomeno da Paixão de Jesus ohin simu vizita kortezia husi embaixadora Federasaun Rússia mai Indonézia no Timor-Leste (não residente), S.E Lyudmila Vorobieva akompaña husi Adidu Militár no Naval Capt Naval Sr. Sergey Zhenovatyy iha fatin kortezia Ministériu Defeza.

Inkontru ne’e nu’udar inkontru kontinuasan entre Ministru Defeza Timor-Leste ho Vice-Ministru Defeza Rússia Col. Jenerál Alexander Vasilyevich Fomin ne’ebé hala’o iha marjin Diálogu Shangri-La iha Singapura iha Juñu 2019.

Iha biban ne’e Ministru Defeza agradese ba kompromisu Rússia nian hodi estabelese kooperasaun defeza ho Timor-Leste no ba konvite ba Ministru hodi ba partisipa tiha ona iha eventu internasionál militár iha Rússia iha Jullu 2019 fulan hirak liubá. 

Ho vizita ne’e tuir Ministru defeza ne’e  katak, nu’udar país joven, Timor-Leste hakarak estabelese kooperasaun defeza ho país hothotu, liliu iha mundu globalizadu ohin-loron ne’ebé infrenta dezafiu kompleksu  oioin, país sira presiza kria kooperasaun no parseria. País ida mesak sei labele responde ba dezafiu global sira ne’e.

Embaixadora Sra.Lyudmila Vorobieva ne’e haktuir, maski Rússia no Timor-Leste seidauk iha kooperasaun ida maka’as, país rua sempre fó apoiu ba malu iha nível ONU nian.

Embaixadóra ne’e kon-ba kooperasaun defeza entre Rússia ho país sira iha rejiaun liliu ho Estadu-Membru ASEAN nian iha setór defeza no seguransa.

Tanba ne’e Rússia iha kompromisu no prontidaun atu fó apoiu ba Timor-Leste iha setór defeza, no Embaixadora ne’e transmite kedas desizaun ne’ebé ninia governu foti ona atu fó oportunidade bolsa de estudos ba ofisiais husi F-FDTL no funsionáriu sivil sira atu ba frekuenta kursu iha instituisaun superiór iha Rússia. Rússia mós sei konvida Timor-Leste hodi ba tuir formasaun ka treinu no partisipa iha forum oioin kona-bá defeza nian iha país refere.

Iha faze tuir mai, parte rua Timor-Leste no Rússia sei intensifika liután interaksaun atu bele implementa apoiu ne’ebé Rússia sei fó ba Timor-Leste liliu iha área edukasaun ka kapasitasaun ba F-FDTL no funsionáriu sivil iha Ministériu Defeza.

Embaixadora mós informa katak Rússia sei akredita Adidu Militár mai Timor-Leste no sei fasilita kontaktu entre Adidu Seguransa Rússia nian iha Jakarta, Indonézia atu bele esplora mós oportunidade koperasaun iha área seguransa liliu ho polísia.

Kobertura: Ligia Noronha/ Gil Barros

Deskulpa - Komentariu ami Taka

error: Content is protected !!