Ministru Defeza Hato’o Agradesementu Ba EUA, Apoiu Iha Setór Defeza

DILI: Relasiona ho vizita kortezia iha 24 Outubru 2019, husi Adjuntu Assistente Interinu ba Sekretáriu Defeza Estadus Unidus Amérika (EUA) no Diretór Prinsipal Súl no Sudeste Aziátiku iha Gabinete Sekretária Defeza EUA, Señor Chris Johnstone mai Ministériu Defeza, hodi partiila hamutuk hanoin kona-ba oinsá atu dezenvolve setór defeza, tanba ne’e Ministru Defeza no Ministru Interior Interinu, Brig.Gen (Ref) Filomeno da Paixão de Jesus iha biban ne’e hato’o agradesimentu ba apoiu tomák.

Iha progresu signifikante iha relasaun bilaterál entre país rua. Durante tinan ida ne’e, iha vizita autoridade nível altu husi EUA mai Timor-Leste, ne’e hatudu kompromisu EUA hodi hametin liután parseria bilaterál defeza ho Timor-Leste.

Ministru Defeza haktuir, Timor-Leste nu’udar país kiik ne’ebé fiar iha multilateralizmu kontinua habelun ho país oioin iha mundu. EUA nu’udar país belun Timor-Leste, Timor-Leste sei hametin liután relasaun ho país amigu refere. País rua partilha valór no prinsípiu hanesan kona-bá demokrasia, direitu umanu no direitu internasionál.

“Dezafiu ne’ebé mundu infrenta ne’e kompleksu no multidimensionál, tanbá ne’e, país sira presiza kria kooperasaun no parseria atu bele buka solusaun ba dezafiu komun sira ne’ebé rejiaun no mundu infrenta. Interkámbiu ideas ka hanoin entre país sira ajuda promove no hametin liután konfiansa-mutúo no tranparánsia entre estadu” haktuir Ministru Defeza iha sala kortezia Ministériu Defeza Fatuhada.

Ministru Defeza mós reafirma, Timor-Leste hein hela resposta husi EUA ba proposta hodi rehabilita Aeroportu Baucau no proposta hodi adere ba Programa Parseria Estadu.

Ikus liu, Ministru Defeza akresenta katak kapasitasaun ba F-FDTL no funsionáriu sivil iha Ministériu Defeza ne’e sai nu’udar programa prioritária, tanbá ne’e agradese tebtebes EUA ba prontidaun hodi kontinua simu Timoroan sira ba frekuenta kursu ka formasaun iha Amérika.

Iha biban ne’e mós Señor Chris Johnstone hatan katak,  EUA partilla ho Timor-Leste, país rua fiar iha importánsia husi multilateralizmu. EUA fó apoiu ba adezaun Timor-Leste iha ASEAN. Timor-Leste ho EUA estabelese relasaun bilaterál ne’ebé kle’an, EUA hakarak kontinua relasaun refere.

“EUA komprometidu  kopera ho Timor-Leste hodi rehabilita Aeroportu Baucau, agora parte EUA sei hala’o hela konsulta internu ho Kongresu Amerikanu,” tenik Señor Chris Johnstone ne’e.

Señor Chris Johnstone husu mós apoiu ba Timor-Leste hodi fó apoiu ka endorsa inisiativa internasionál balu ne’ebé EUA promove hela. Ministru responde katak Timor-Leste toma nota pedidu sira ne’e no sei estuda hamutuk ho instituisaun relevante seluk molok foti desizaun final.

Entertantu Embaixadora EUA S.E Kathleen M.Fitzpatrick mós informa, projetu Aeroportu Baucau sei hala’o gradualmente.

Média MD

Deskulpa - Komentariu ami Taka

error: Content is protected !!