MAGAZINE MD#Edisaun_III#COMING SOON.

Austrália Atualiza MD, Projeitu Konstrusaun Portu Naval Hera

DILI:  Governu Austrália liuhusi nia embaixadór iha Timor Leste,   atualiza Ministru Defeza Brig.Gen (Ref) Filomeno da Paixão de Jesus, kona-bá projetu konstrusaun infrastrutura iha Porto Naval Hera molok ró rua ne’ebé oferese husi Austrália entrega ba Timor-Leste iha tinan 2023.

Liuhusi inkontru ohin Kinta-feira 29 Jullu 2021 Ministru Defeza ho Embaixadór Austrália iha Timor-Leste, Señor Peter Roberts iha sala kortezia Ministeriu Defeza, Fatuha Dili.

Embaixadór agradese governu tanba deside ona hodi assina Arranjos Técnicos kona-bá konstrusaun infrastrutura iha Porto Naval Hera.

Embaixadór mos partilha informasaun kona-bá kompromisu governu Australianu nian hodi kontinua fó apoiu ba Timor-Leste iha prevensaun pandemia COVID-19. Embaixadór louva esforsu no seriedade governu Timor-Leste hodi prevene COVID-19 no enkoraja populasaun hodi simu vasina kontra pandemia global refere.

Xefe Misaun Austrália ne’e mos reitera kompromisu ninia governu hodi kontinua fó apoiu ba dezenvolvimentu Timor-Leste no reitera importánsia atu kolabora ho Timor-Leste iha dezenvolvimentu ekonómiku maski mundu infrenta hela pandemia mundial COVID-19.

Ministru Defeza partilha mos informasaun kona-bá planu governu liliu Ministériu Defeza ba dezenvolvimentu infrastrutura iha Porto Naval Hera. Ministru informa katak Ministériu Defeza iha hela faze levantamentu dados kona-bá kustu no dados nesesáriu seluktan molok governu deside hodi konstroi infrastrutura liliu parte sira iha Porto Naval Hera ne’ebé Timor-Leste mak sei responsabiliza.

Ministru Defeza no Embaixadór haktuir katak projetu konstrusaun ba Porto Naval Hera husi governu Austrália no iha futuru husi governu Timor-Leste sei hala’o iha maneira ida aliñadu no integradu.

Iha fulan Agostu, Timor-Leste ho Austrália sei hala’o Reuniaun Anual Defeza nian, ne’e sai nu’udar eventu ne’ebé hala’o kada tinan hodi nune’e parte rua bele halo diskusaun no avaliasaun hamutuk kona-bá koperasaun defeza ne’ebé hala’o durante ne’e.

Média MD

Deskulpa - Komentariu ami Taka

error: Deskulpa Kontent ami protected !!