MAGAZINE MD#Edisaun_II#Free download.

Governo Filipina Mantein Kooperasaun Diak ho Ministériu Defeza Timor-Leste

Dili: Iha loron Sesta, 25 Agusto 2018, Ministru Defeza Brigadeiro Jeneral Filomeno da Paixão de Jesus  hala’o enkontru ho Adidu Defeza Filipina mai Timor-Leste, Col. Rodrigo. Iha inkontru refere, Col. Rodrigo hato’o karta ofisial hodi husi Ministro Defeza Filipina hodi kongratula nomeasaun no pozisaun foun Brigadeiro Jeneral Filomeno da Paixão de Jesus hanesan Ministro Defeza Timor-Leste. Nune’e mós atu informa bá Ministro Defeza katak, Governo Filipina iha interese atu kontinua hametin kooperasaun militar ne’ebé eziste ona.

Iha okaziaun ne’e, Ministro Defeza Timor-Leste hato’o agradese bá kooperasaun ne’ebé estabelese ona durante ne’e. Tuir Ministro, apoiu Governo Filipina iha formasaun Pilotu Aviaun sivil importante tebes. Maibé bá oin, F-FDTL presiza mós formasaun Pilotu militar, liuliu aviaun helikopteru. Ida ne’e mak planu Ministériu Defeza bá oin. Ministro mós informa tan katak, nia sei husu mós pareser Governo Filipina nian kona-bá kustu treinamentu no formasaun pilotu militar bá aviaun helikopteru atu halo konparasaun ho pareser ho parte sira seluk.

Durante sorumutu ne’e, Adidu Militar Filipina mós informa bá Ministro kona-bá formasaun pilotu ne’ebé implementa ona no hein katak, Governo Filipina ho Timor-Leste bele reve hikas Memorandum of Understanding (MoU) hodi inklui fali assuntu ne’ebé seidauk tama iha kontiúdu MoU ne’e. Ministro Defeza informa katak, MoU iha ne’e iha prosesu nia laran no tuir prosidementu sei husu pareser husi MNEC no Gabinete Prezidente antes lori bá Konsellu Ministro hodi hetan aprovasaun. (MeD)

Deskulpa - Komentariu ami Taka

error: Deskulpa Kontent ami protected !!