MAGAZINE MD#Edisaun_II#Free download.

Governo Japaun Kontinua Fó Asisténsia Tékniku bá F-FDTL

Dili: Iha loron 3 Agostu 2018, Ministru Defeza Brigadeiro Jeneral Filomeno da Paixão de Jesus hala’o inkontru kortezia ho Ambaixadór Japaun nian mai Timor Leste Sr.  Hiroshi Minami. Iha inkontru refere, Señor Ambaixadór hodi Estado no Governo Japaun nia naran hato’o parabens no dezeju susesu bá Señor Ministru Defeza iha responsabilidade foun ida ne’e.

Ambaixadór Japaun informa bá Ministru katak, sira nia governu iha komitmentu bo’ot hodi kontinua apoiu Forsa Defeza (F-FDTL). Durante ne’e, Governo Japaun fó apoiu liu iha área enginéria militar hanesan kapisitasaun, manutensaun no formasaun tékniku sivil nian. Ambaixadór informa katak, Governo Japaun sei kontinua apoiu nafatin F-FDTL bá parte refere.

Liga ho assuntu ne’e, Ambaixadór Japaun informa bá Ministro katak, presiza tebes atu Governo Timor-Leste, atravez husi Ministériu Defeza bele reve hikas Memorandum of Understandin (MoU)  ne’ebé  antes ne’e iha ona akordu maibé liu ona tempu.

Iha inkontru ne’e, Ministru Defeza hodi Governo no Ministériu Defeza nia naran hato’o mós agradesimentu kle’an bá governu Japaun, liuliu bá apoiu hotu ne’ebé durante ne’e Timor-Leste simu husi Governo Japaun, bá F-FDTL.

Ministro mós reafirma katak, Timor-Leste hakarak kontinua dezenvolve relasaun diak ho Japaun. Ho kapasidade no rekursu ne’ebé, Timor-Leste hakarak kontribui bá estabilidade iha rai laran no estabilidade seguransa iha regiaun tomak. Tanbá ne’e, iha tempu badak, Ministro mós sei reve hikas MoU no agreement ne’ebé iha hodi reforsa kooperasaun ne’ebé iha ona.

Señor Ambaixadór hatete, nia governu iha kompromisu atu koopera nafatin ho Timor-Leste iha área defeza hanesan seguransa marítima no kapasitasaun bá F-FDTL hodi bele responde bá dezafiu sira iha tasi hanesan peska ilegal. Parte rua Timor-Leste ho Japaun komprometidu hodi hametin liután relasaun bilateral iha setór defeza.


 

Deskulpa - Komentariu ami Taka

error: Deskulpa Kontent ami protected !!