MAGAZINE MD#Edisaun_III#COMING SOON.

Governu Aprova Ona Dekretu Lei Estatutu Organíku F-FDTL

DILI: VIIIGovernu Konstitusionál, liuhusi inkontru Konsellu Ministru ohin, aprova ona dekretu lei estatutu organíku F-FDTL nian, ne’ebé aprezenta husi Ministru Defeza Brig-Gen, (Ref), Filomeno da Paixão de Jesus, iha Pálasiu Governu, Dili.

Diploma ida-ne’e ho objetivu atu halo reforma orgánika Forsas Armadas nian permite atu fó resposta ida adekuada liu ba dezafiu no misaun foun sira ne’ebé ezije resposta sira ne’ebé integrada liu hamutuk ho ita-nia parseiru estratéjiku sira iha nivel rejionál no mundiál. Diploma ne’e klarifika kompeténsia sira kona-ba ninia órgaun no servisu sira no promove atu hadi’a artikulasaun polítiku-militár nian relasiona ho Defeza Nasionál.

Projetu Dekretu-Lei ne’e mós ho objetivu atu kompatibiliza orgánika F-FDTL nian la’os de’it ho kontestu legál atuál, hanesan, Lei Defeza Nasionál no Sistema Autoridade Marítima, maibé mós ho dokumentu estruturante lubun ida iha área Defeza nian, maka hanesan, Konseitu Estratéjiku Defeza no Seguransa Nasionál, Konseitu Estratéjiku Militár, Sistema Forsas Nasionál, Misaun Forsas Armadas no Dispozitivu F-FDTL nian.

Iha parte seluk mós Konsellu Ministru aprova mós projetu Dekretu-Lei, ne’ebé aprezenta husi Ministru Ensinu Superiór, Siénsia no Kultura, Longuinhos dos Santos, atu estabelese rejime jurídiku kona-ba kurríkulu padraun nasionál ensinu superiór nian no regulamenta sistema bináriu, rejime jurídiku ba grau no diploma sira ensinu superiór nian, kondisaun ba ninia atribuisaun, sistema kréditu, kalendáriu letivu, sistema avaliasaun ba unidade kurrikulár no konkluzaun ba programa estudu sira.

Dekretu-Lei ne’e ho objetivu atu, regulamenta no dezenvolve diploma no grau sira ne’ebé sistema ensinu bináriu bele oferese ba estudante sira ensinu superiór nian no garante sistema transferibilidade ida entre sira ne’e rasik, Garante koñesimentu no kompeténsia mínimu ne’ebé presiza hodi hala’o profisaun determinada ida, Define sistema avaliasauan ida ba ensinu superiór, Halo estudante sira sai emprendedór no kompetitivu liu iha merkadu traballu atuál nasionál no internasionál, garante koñesimentu no kompeténsia sékulu 21 nian ba sira, Permite atu alunu no dosente sira ensinu superiór nian bele uzufrui kuadru mobilidade nasionál no internasionál nian ida iha sira nia planu estudu, nune’e mós iha sira nia kompeténsia rekoñesida iha merkadu traballu internasionál; noFasilita prosesu rekoñesimentu ba diploma ne’ebé alunu sira hetan iha estabelesimentu ensinu superiór nasionál iha nivel internasionál nune’e mós permite rekoñesimentu ba diploma sira ne’ebé hetan iha estranjeiru iha nivel nasionál.

Konsellu Ministrus aprova projetu Dekretu-Lei kona-ba Kriasaun Liña Kréditu “Fasilidade Garantia Kréditu Suave”. Projetu Dekretu-Lei ne’e aprezenta husi Ministru Turizmu, Komérsiu no Indústria, José Lucas do Carmo da Silva, ho objetivu atu promove no estimula emprendedorizmu sosiál no aposta iha projetu inovadór sira, hodi permite fortalesimentu ba tesidu emprezariál no industriál nasionál. Liña Kréditu ”Fasilidade Garantia Kréditu Suave” hodi apoia kapitalizasaun no fasilita asesu finansiamentu ba empreza mikro, kiik no média sira, liuliu ne’ebé foka liu ba emprendedorizmu sosiál no inovasaun iha setór komérsiu, turizmu no indústria.

Ministru Finansas, Rui Augusto Gomes, aprezenta projetu Dekretu-Lei, ne’ebé aprova husi Konsellu Ministrus, kona-ba Pagamentu estraordináriu husi saláriu adisionál fulan ida nian ba funsionáriu, ajente no kontratadu sira administrasaun públika nian. Funsionáriu no ajente sira hotu Administrasaun Públika nian abranje iha pagamentu estraordináriu ida-ne’e, exetu funsionáriu kontratadu estranjeiru sira.

Konsellu Ministrus aprova mós projetu Dekretu Governu nian, ne’ebé aprezenta husi Ministru Finansas, kona-ba pagamentu suplementár ba funsionáriu no ajente sira ne’ebé maka halo serbisu ba prosesu preparasaun Orsamentu Jerál Estadu tinan 2022 no taka Konta Jerál Estadu tinan 2021 nian. Suplementu ida-ne’e ho objetivu atu kompensa volume estraordináriu serbisu husi funsionáriu no ajente sira Ministériu Finansas nian ba prosesu ne’ebé ezije no rekoñese katak iha jornada serbisu ida ne’ebé boot liu kompara ho períodu normál ne’ebé prevee iha lei.

Konsellu Ministrus aprova, ho alterasaun, ba projetu Dekretu-Lei, ne’ebé aprezenta mós husi Ministru Finansas, kona-ba alterasaun dahuluk ba Dekretu-Lei Rejime Jurídiku Parseria Públiku Privada ba Portu Tibar. Ho diploma ida-ne’e prevee katak Estadu tenke disponibiliza terrenu ne’ebé presiza ba ezekusaun medida sira ne’ebé prevee ona iha lisensa ambientál, iha deklarasaun ba impaktu ambientál no iha planu jestaun ambientál nian no atu konsesionária bele asesu, tranzita no hala’o serbisu iha terrenu ne’e.

Média MD

Deskulpa - Komentariu ami Taka

error: Deskulpa Kontent ami protected !!