MAGAZINE MD#Edisaun_III#COMING SOON.

KM Fó Poder Ba MD, Konstrusaun Portu Hera

DILI: Iha Kuarta-feira horsehik 28 Jullu 2021, liuhusi inkontru Konsellu Ministru (KM) fó podér tomák ba Ministru Defeza, Filomeno da Paixão de Jesus, hodi asina akordu entre Ministru Defeza Timor Leste no Departamentu Defeza Australia (DDA), hodi halao atividade infrastutura no instalsaun ba Portu Hera.

Investimentu iha projetu ne’e atu garante retornu boot no iha aumentu turizmu no investimentu privadu, hodi dezenvolve negósiu no kria empregu. Akordu ne’e atu promove dezenvolvimentu infraestrutura sira hodi hasa’e kapasidade no sustentabilidade FALINTIL-Forsa Defeza Timor-Leste (F-FDTL) asisténsia benefísiu ba parte rua Timor-Leste no Austrália nian. Ho akordu ne’e, DDA sei realiza atividade ne’ebé nesesáriu ba konstrusaun iha Portu Hera hodi entrega, iha tinan 2023, hein  ro’o patrulla (GSB) rua ne’ebé Austrália sei fó ba Timor-Leste.

Alinde portu heran Konsellu Ministru mós aprova alterasaun, projetu deliberasaun kona-ba Planu dezenvolvimentu ba Portu Dili, ne’ebé aprezenta husi ministru Transporte Terrestre no Komunikasoins, José Agustinho da Silva. Planu ne’e aprova hodi prevee reestruturasaun no moderniza ba Portu Dili, hafoin transferénsia funsaun portu karga nian ba portu foun Tibar, no nia konversaun iha marina ida no portu kruzeiru sira.

Durante iha inkontru Konsellu Ministru asuntu importante ne’ebé deskute no halo aprovasaun mak hanesan, aprova Dekretu Governu kona-ba medida sira ezekusaun Deklarasaun Estadu Emerjénsia nian, ne’ebé efetua husi Prezidente Repúblika n. 56/2021, loron 27 fulan-jullu, hodi hatán ba pandemia COVID-19. Estadu emerjénsia, ne’ebé renova ona, abranje ba territóriu nasionál tomak no vigora entre tuku 00:00, loron 1 fulan-agostu tinan 2021 to’o tuku 23:59 loron 30 fulan-agostu tinan 2021.

Konsellu Ministrus delibera mós projetu Rezolusaun Governu nian rua hodi, mantein Impozisaun serka sanitária iha munisípiu Dili to’o oras 23:59 husi loron 12 fulan-agostu tinan 2021.  Impoin serka sanitária iha munisípiu Ermera entre oras 00:00 husi loron 29 fulan-jullu tinan 2021 to’o oras 23:59 loron 12 fulan-agostu tinan 2021.

Aprova mós projetu Rezolusaun Governu nian ne’ebé aprezenta husi Ministru Administrasaun Estatál, Miguel Pereira de Carvalho, hodi nomea Guilhermina Filomena Saldanha ba Kargu Prezidente Autoridade Munisipál Dili, ba periodu tinan lima, hahú husi data simu pose nian.

Konsellu Ministrus aprova, ho alterasaun, projetu Proposta Lei Komisaun Funsaun Públika, ne’ebé aprezenta husi Ministru Prezidénsia Konsellu Ministrus , Fidelis Manuel Leite Magalhães. Liu ona tinan sanulu husi nia kriasaun, ho lei ida-ne’e sei pretende reforsa garantia sira independénsia atuasaun Komisaun nian no ninia Komisáriu sira, nune’e mós tuir kedas reforma ba nia ámbitu intervensaun, liuliu, atu rezolve problema sira ne’ebé identifika ona ne’ebé signifika difikuldade ba efisiénsia funsionamentu Funsaun Públika.

Aprova mós, ho alterasaun, projetu delibersaun ne’ebé aprezenta husi Ministro Finansas, Rui Augusto Gomes, kona-ba revizaun ba valór husi tarifa kobransa nian ba utilizadór sira iha Portu Tibar, taxa konsesaun ne’ebé sei hetán husi konsesionária, hanesan royalty, no penalidade sira ne’ebé selu husi konsesionária tamba la kumpre rekezitu mínimu sira servisu no ekipamentu nian.

Konsellu Ministrus aprova, ho alterasaun, projetu deliberasaun kona-ba selebrasaun Akordu Finansiamentu ida no Akordu Kontribuisaun Finanseira ho Banku Dezenvolvimentu Aziatiku. Akordu rua ne’e refere ba projetu dezenvolvimentu infraestrutura be’e no saneamentu ne’ebé lokaliza iha Viqueque, Lospalos no Same. Konsellu Ministrus fó podér tomak ba Ministru Finansas, hodi reprezenta Estadu Timor-Leste atu asina akordu ne’e.

Realiza aprezentasaun husi Ministériu Administrasaun Estatál no Ministériu Obras Públikas ne’ebé hatudu ona impaktu husi inundasaun no resposta emerjénsia nian, no atu rekupera estragu sira. Daudaun ne’e, sei iha ema hamutuk nain 731 maka hela iha sentru akollamentu neen ne’ebé sei ativu iha sidade Dili. Totál ema hamutuk nain 34 maka mate no nain 14 maka lakon.

Durante aprezentasaun, aprezenta mós projetu sira ne’ebé la’o hela ka sei dezenvolve iha kurtu no longu prazu, la’os atu rezolve de’it estragu sira ne’ebé identifika ona, maibé atu prevene no reduz risku sira husi dezastre sira tuirmai no kria infraestrutura sira ne’ebé rezilente liu.

Ministru Petróleu no Minerais, Víctor da Conceição, halo aprezentasaun ida kona-ba planu projetu konstrusaun Terminál Importasaun Petróleu nian iha Metinaro. Terminál ne’e sei lokaliza iha Aldeia Manleu, Suku Wenunuk, Postu administrativu Metinaru, Munisípiu Dili, no sei iha kapasidade hodi armazena petróleu ba loron 120.

Média MD

Deskulpa - Komentariu ami Taka

error: Deskulpa Kontent ami protected !!