MAGAZINE MD#Edisaun_II#Free download.

MD Kontinua Konvoka Reuniaun Ho Ekipa Liña Ministerial, Deskute Regulamentu AMN

DILI: Ministériu Defeza liu husi Gabinete 2020, iha Kinta-feira 11 Fevereiru 2021 kontinua konvoka reuniaun ho liña Ministerial sira ba dala tolu, hodi deskute regulamentu kona-ba Autoridade Marítima Nasionál (AMN) ne’ebé lidera husi Xefe Estadu Maiór Jenerál (F-FDTL), Maijór Jeneral Lere Anan Timur.

Objetivu husi reuniaun ne’e, hodi deskute regulamentu interna haat ne’ebé sei implementa iha Autoridade Marítima Nasionál (AMN) Timor-Leste. Regulamentu haat ne’e hanesan, regulamentu ba Komisaun Asuntu Mar (CAM), regulamentu Diresaun Autoridade Marítima (DAM), regulamentu Kapitál no regulamentu ba Atividade Unidade Marítima no Forsa Jurisdisaun.

Iha enkontru liña Ministerial ne’e,  Xefe Estadu Maiór Jenerál F-FDTL ne’e hatete, regulamentu haat ne’ebé ekipa sira diskute importante tebes hodi sai mata-dalan ba AMN nia serbisu ba future, tanba liña ministériu no instituisaun Estadu 20- resin hola parte iha AMN.

Ho nune’e Governu kria kondisaun prepara harii infraestrutura báziku ba Navál nian inklui edifísiu no ekipamentu serbisu AMN nian ne’ebé tuir planu sei harii iha Portu Navál Here-Dili.

Tanba, bainhira ekipa sira diskute regulamentu no rekizitu serbisu sira seluk remata ona, kada ministériu no instituisaun autónoma sira sei propoin sira-nia funsionáriu na’in rua hodi hola parte iha AMN no prepara fó pose ba estrutura sira.

Jenerál ne’e mós husu ba ekipa tékniku presiza ativu atu hato’o ideia matenek sira hodi ekipa bele elabora ninia rekizitu ho di’ak molok implementa.

“Reuniaun ida ne’e importante para sira bele diskute asuntu balun liga ho regulamentu sira ne’ebé sei regula no implementa iha AMN,”dehan  Xefe Estadu Maiór Jenerál F-FDTL ne’e  bainhira hala’o entervista ho Jornalista sira, iha Salaun Kuartel Fatuhada, Dili.

lha oportunidade ne’e mós, Kapitaun-Mar-Guerra, Higino da Neves, informa sira kontinua konvida ekipa liña ministeriál sira hodi partisipa para bele fó ideia ba kriasaun regulamentu sira ne’ebé sei estabelese iha AMN.

Nia dehan, regulamentu ne’ebé ekipa konjunta elabora hotu ona, kompostu hosi Regulamentu ba Komisaun Asuntu Mar (CAM) hodi entrega ona ba Ministru Defeza atu aprezenta ba Konsellu Ministru.

Tuir Ajenda ne’ebé planeia regulamentu hirak ne’e ekipa sei deskute no termina iha fulan Abril 2021.

Média MD

Deskulpa - Komentariu ami Taka

error: Deskulpa Kontent ami protected !!