Primeiru Governo RDTL 1975


Iha 28 Novembro 1975, Fretilin unilateralmente proklama indepéndensia Timor-Leste husi kolonializasaun Portugues. Ho proklamasaun ida ne’e, dejure laiha lijitimasaun tanba la hetan rekoñesimentu internasionál, maibé defactohamosu ona ezisténsia povu no rai Timor-Leste nu’udár nasaun no estado ida ho naran República Democrático de Timor Leste ou RDTL. Iha tempu ne’e kedas, Comité Central Fretilin hahu legaliza pimeiru Konstituisaun RDTL , hino nasionál , bandeira nasionál, forma nia estrutura Governo no Estado ne’ebé kompostu husi Presidente da República, Primeiro Ministro, Ministro no Sekretáriu sira.

Iha momentu ne’e kedas, Primeiro Ministro RDTL, Saudozu Nicolau dos Reis Lobato nomeia Sr. Rogerio Diamentino Tiago Lobato hanesan Ministro Defeza no Saudozu Hermenegildo Alves hanesan Vice-Ministro Defeza. Maibé kargu ne’e ladura, tanba iha loron 7 Dezembru 1975 militar Indonésia hahu invada teritóriu Timor-Leste.  Nune’e, primeiru estrutura orgániku Governo RDTL  iha tempu ne’ebá la funsiona no desolve.

Restaurasaun Independénsia 2002

Instituisaun Defeza República Democrático Timor Leste (RDTL) re-establese hikas liu husi Io Governo Konstitusionál iha tinan 2002 hafoin Timor-Leste hetan restaurasaun independénsia. Ezisténsia Instituisaun Defeza legaliza liu husi Dekretu-Lei No 2/2002, kona-bá Orgániku Io Governo Konstitusionál .  Iha estrutura IoGoverno, Instituisaun Defeza hanaran ho Secretário Estado da Defeza no nia kompeténsia maka atu dezenvolve misaun estratéjiku defeza nian ne’ebé mensiona ona iha Konstituisaun RDTL  Art. 146. Nune’e mós misaun Secretário Estado Defeza nian atu dezenvolve polítika defeza nian, liuliu planu dezenvolvimentu forsa defeza Timor-Leste ou F-FDTL. Iha Primeiro Governo ne’e, Dr. Roque Rodrigues hetan konfiansa hanesan Secretario do Estado bá asuntu Defeza. Dr. Roque Rodrgiues resigna-an husi nia kargu hafoin mosu krize militar iha fulan Marsu-Juñu  tinan 2006.

Hafoin krize 2006, hahu fulan Augusto 2006, estabelese IIo Governo Konstitusionál  ne’ebé lidera husi Dr. José Manuel Ramos Horta. Iha tempu ne’ebá, Dr. Jose Ramos Horta asume kargu hanesan Primeiro Ministro nomós kargu hanesan Ministro Defeza. Iha IIo Governo Konstitusionál, instituisaun Defeza sa’e husi nivel Secretário Estado bá Ministério liu husi Decreto-Lei No 16/2006, kona-bá Ministerio Defeza .  Mudansa ida ne’e hanesan dezisaun importante ida hafoin mosu krize iha instituisaun F-FDTL. Iha tempu ne’e kedas, Dr. Jose Ramos Horta hanoin katak urgentemente atu fó apoiu maka’as bá dezenvolvimentu forsa defeza, liuliu dezenvolve polítika prioridade ne’ebé bele atende ba nesesidade forsa nian hanesan, farda, armamentu, lei, regulamentu, residensia, idifísu, veteranus no seluk-seluk tan.

Iha fulan Abril 2007, Primeiro Ministro Jose Ramos Horta resigna-an husi kargu Primeiro Ministro no kandidata an ba Presidente da República periodu 2007-2018. Tanba ne’e estabelese fali IIIo Governo Konstitusionál  no Primeiro Ministro mak Eng. Estanislau da Silva. Hanesan mós ho IIGoverno Konstitusionál, Primeiro Ministro asume mós kargu hanesan Ministro Defeza hanesan difini ona iha Dekretu-Lei No 16/2006.

Maibé durasaun III hanesan governasaun tranzisaun deit ne’ebé nia durasaun remata la’o fulan haat deit. Iha fulan Agusto 2007 legaliza IVo Governo Konstitusionál  ne’ebé lidera husi Sr. Kay Rala Xanana Gusmão. Iha tempu ne’e, Instituisaun defeza no seguransa elabora hanesan instituisaun ida deit ho naran Ministério Defeza no Seguransa liu husi Dekretu-Lei No 31/2008 . Polítika ida ne’e hanesan estratéjiku IVo Governo Konstitusionál atu halo reforma bá setór defeza no seguransa. Iha tempu ne’e, Sr. Kay Rala Xanana Gusmão asume mós kargu hanesan Ministro Defeza no Seguransa.  Bazeia bá Dekretu-Lei No 31/2008 hamosu mós sekretariadu rua hodi toma konta bá assuntu Defeza (F-FDTL) no Seguransa (PNTL). Sekretáriu Defeza nomeia Dr. Julio Thomas Pinto no Sekretariu Estado Seguransa nomeia DR. Francisco Guterres. Iha Sr. Kay Rala Xanana Gusmão nia lideransa tranforma F-FDTL no PNTL sai forsa ida profesional ida integradu. F-FDTL no PNTL iha kooperasaun konjunta no komunikasaun efetivu. F-FDTL ho PNTL dezenvole rápidu iha jestaun komando, lojísitku, rekursu umanu no intervensaun bá área defeza no seguransa. Sentralizasaun polítiku iha komando Kay Rala Xanana Gusmão konsolida hikas forsa PNTL no F-FDTL nia moral, konfiasa. Kondisaun ida ne’e restabelese hikas seguransa no garante estabilidade husi tinan 2007-2012.

Iha fulan Agusto tinan 2012, estabelese Vo Governo Konstitusionál estabelese liu husi. Sr. Kay Rala Xanana Gusmão kontinua mantein estrutura  anterior IVo Governo Konstitusionál nian hodi kontinua lidera Ministériu Defeza no Seguransa. Sekretáriu Estado Defeza no Seguransa mós delega nafatin bá Dr. Julio Thomas Pinto no DR. Francisco Guterres. Maibé iha tinan 2015 mosu remodelasaun hodi hamosu VIo  Governo Konstitusionál estabelese liu husi Dekretu-Lei No 6/2015 . Iha VIo Governo Konstitusionál ne’e, Primeiro Ministro mak Dr. Rui Maria de Araujo  no Ministro Defeza nomeia fali Dr. Cerilio Cristovão. Ministério Defeza la’o ho orgániku foun Dekretu-Lei No 20/2015  ne’ebé separa Ministerio Defeza ho Ministerio Seguransa (Interior).

Iha fulan Setembro 2017 estabelese VIIo Governo Konstitusionál liu husi Dekretu Lei No 35/2017 . Primeiro Ministro maka Dr. Mari Alkatiri no nomeia Sr. Jose Agustinho Sumotxo hanesan Ministro Defeza no Seguransa. Maibé governasaun ida ne’e la’o fulan neen (6) deit tanba laiha konsensu polítiku iha Parlemento Nasionál. Governasaun ida ne’e la’o minoria no remata nia mandato iha fulan Juñu 2018.

Iha fulan Juño 2018 VIIIo Governo Konstitusionál estabelese liu husi Dekretu-Lei No 14/2018.  Primeiro Ministro maka Sr. Taur Matan Ruak no nomeia Brigadeiro-General Filomeno da Paixão de Jesus hanesan Ministro da Defeza no iha tempu hanesan kaer mos posta hanesan Ministerio interinu bá Ministério Interior.

error: Content is protected !!