Díli 01 de julho de 2023 – Presidente Repúblika, Dr, José Ramos Horta fó posse ba Contra-Almirante Donaciano Costa Gomes, Ph.D, hanesan Ministru Defeza foun IX-Governu Konstitusional ba mandatu tinan lima oin mai. Serimónia ne’e realiza iha resintu Palácio Presidencial, Aitarak Laran, Díli.

Durante serimónia, Primeiru Ministru, Kay Rala Xanana Gusmão, enfatiza katak IX-Governu sei prioritiza setores importante sira, liu-liu edukasaun, saúde, defesa no área sira ne’ebé konsidera fundamental hodi bele presta servisu diak ba nasaun.

Ministru Defeza mak responsavél ba deseña, ezekusaun, koordenasaun no avaliasaun ba polítika ne’ebé define no aprova liu husi Konsellu Ministru ba área deffeza nasionál no kooperasaun militar.

Iha parte seluk, iha serimónia boas-vindas iha Salaun Auditorium Ministériu Defeza nian, Contra-Almirante Donaciano Gomes, Ph.D, iha ninia mensajen dahuluk ba dirigente sira nia subliña katak “Timor-Leste país neutru ida, tanba ne’e, ha’u husu ba dirigente sira iha Ministériu Defeza hodi garante seguransa ba ita-nia soberania nasionál no independénsia nasionál hodi garante paz no estabilidade ba nasaun husi ameasa sira ne’ebé mai husi liur”.

Rekorda katak, Ministru Defeza, Donaciano Gomes ‘Pedro Klamar Fuik’ hetan posse husi Presidente repúblika sessante, Dr, Francisco Guterres Lú-Olo, hodi assume kargu hanesan Xefe de Estadu-Maior das FALINTIL-Forças de Defesa de Timor-Leste ba períodu tinan ida.  

Média MD