Lisboa, 20 de outubro 2023 – Aproveita nia deslokasaun ba Portugal hodi partisipa hanesan oradór iha konferénsia datoluk kona-ba Estado Frágil sira, ho tema “Desafiu global no nia impaktu ba nasaun afetadu sira husi konflitu”, ne’ebé promove husi G7+ no Clube Lisboa,  S. E. Ministra Defeza Nasionál Portugal, Helena Carreiras, simu audiénsia husi S. E. Ministru Defeza, Kontra-Almirante, Donaciano do Rosário da Costa Gomes, Ph.D, hodi ko’alia kona-ba kooperasaun.

Audiénsia hahú ho S. E. Ministra Defeza Portugal nia bem-vindo no kumprimenta pessoalmente Ministru Defeza Timor-Leste, Donaciano Gomes, ba ninia nomeasaun hodi lidera Ministériu Defeza. 

S. E. Ministru Defeza Timor-Leste agradese ba felisitasaun relasiona ho nia nomeasaun no mós ba liafuan amigável no simpátika ne’ebé Ministra Defeza nasionál ne’e diriji ba nia iha sira nia hasoru malu.

Durante audiénsia, governante nain rua ne’e aproveita oportunidade hodi troka impressaun kona-ba assuntu oi-oin, liu-liu foka ba kooperasaun iha ámbitu Defeza, nível formasaun, kapasitasaun ba rekursu umanu no ensinu ba lian portugués. 

Aleinde foka ba assuntu mensionadu sira, dirigente nain rua ne’e mós ko’alia kona-ba seguransa marítima, kapasidade operasional, relasaun sira iha ámbitu CPLP nian, projetu CIMIC, renovasaun ba programa Quadro, ne’ebé hein sei konklui ba assinatura iha março 2024, data ne’ebé prevista husi Ministru Defeza Timor-Leste. No ko’alia mós kona-ba vizita Ministra Defeza mai Timor-Leste. 

S. E. Ministra Defeza Nasionál mós transmiti empeñamentu total Portugal no Ministériu Defeza em partikulár atu disponibiliza apoiu sira ba área sira ne’ebé identifika tiha ona no akordu entre nasaun rua iha ámbitu kooperasaun nian, liu-liu formasaun akadémika superiór no téknika ba líder joven sira. 

Iha ámbitu polítika externa nian, S. E. Ministra Defeza Nasionál hateten katak, adezaun Timor-Leste ba ASEAN ne’e pontu pozitivu tebes, la’os de’it estratéjiku ba Timor, maibé mós importante ba Portugal, tanba konsidera Timor-Leste bele sai anél (elo) entre ASEAN, Portugal no nasaun sira CPLP. 

Audíensia refere remata ho troka lembransa entre Governante rua. Husi parte Portugal, partisipa iha audiénsia ne’e mak Diretor-Geral Polítika Defesa Nacional (DGPDN), Major-General Nuno Lemos Pires, Assessora Diplomátika, Dra. Susana Audi. No komitiva husi Timor-Leste mak Ministru Defeza, Assessor Jurídiku, ajudante Campo no secretáriu. 

Media MD