Lisboa, 20 outubro 2023 – S. Exa. Ministru Defeza, Kontra Almirante Donaciano da Costa Gomes ‘Pedro Klamar Fuik’, Ph.D, partisipa iha konferénsia datoluk g7+ kona-ba Estadu Frágil, ho títulu “Desafiu global no nia impaktu ba país afetadu sira husi konflitu”, eventu ida ne’e promove husi g7+, Universidade Autónoma Lisboa no Klube Lisboa, iha Portugal.

Ministru Donaciano da Costa Gomes ‘Pedro Klamar Fuik’, Ph.D, konvidadu hanesan palestrante ba eventu ne’ebé organiza husi g7+ no klube Lisboa. Durante konferénsia, S. Exa. Ministru Defeza aprezenta kona-ba kuadru geopolítiku Indo-Pasífiku no importánsia husi Timor-Leste nia geográfika iha kontestu geopolítiku global. 

Kona-ba kuadru geopolítiku, Ministru Defeza hateten iha ninia diskursu katak, “Indo-pasífiku hanesan espasu geográfiku ne’ebé engloba oseanu Índiku no Pasífiku no extende to’o ba Índia, kosta norte Xina nian, husi tasi Sul Xina ba to’o Oseania, ne’ebé bele hamosu deteriorizasaun ba relasaun entre Estadus Unidus Amérika no Xina hodi bele perturba orden internasional liu husi manifestasaun ho forma diferente”.

Ho efeitu ne’e, S. Exa. Ministru Defeza, Kontra Almirante, Donaciano da Costa Gomes, iha ninia intervensaun, salienta katak, importante atu dezenvolve maneira governasaun multilateral ne’ebé hetan inspirasaun husi ideia paz no estabilidade, hanesan g7+, ne’ebé iha konfiansa, amizade no kooperasaun iha kestaun sira kona-ba kreximentu ekonómiku, progresu sosial, dezenvolvimentu kultural, promosaun ba paz, estabilidade, liu husi respeitu no justisa entre nasaun membru hanesan objetivu sira husi ASEAN nian.

Kona-ba importánsia geográfika Timor-Leste no nia kontextu geopolítiku mundiál, Ministru Defeza Timor-Leste nian afirma katak “la iha dúvida katak nasaun sira hanesan ami, ne’ebé foin sai husi situasaun konflitu no frazilidade, presiza demora dékada ruma atu atinji situasaun ida estabilidade no progresu sustentável. Maske nune’e, prosesu konstrusaun nasaun nian presiza orient aba objetivu paz no ami fiar katak la ho sosiedade pasífika sei la iha dezenvolvimentu sustentável, tanba ne’e desde inísiu, hanesan nasaun, hanesan povu ida, ami kompromete ami nia an atu sai ajente ba paz hanesan estratéjia hodi bele sai husi frazilidade no ba sosiedade ne’ebé reziliénte liu tan”.

Kona-ba pozisaun Timor-Leste nian, S. Exa. Ministru Defeza Pedro Klamar Fuik, Ph.D, afirma katak polítika externa Timor-Leste nian iha objetivu ida hodi estabelese relasaun amizade no kooperasaun ho povu sira seluk. Tanba ne’e, Timor-Leste kontinua pozisiona nia an estratezikamente hanesan ajente ba paz iha área ne’ebé iha interesse estratéjiku ba militar no komersiál.

“Ami konsidera importante atu kontinua empeña estratéjia aksaun oi-oin nian ba kooperasuan, ba parte sira hanesan, multilateral, regional, liu-liu ho Nasaun Unida, g7+, ASEAN, CPL; iha parte seluk, kooperasaun bilateral ho nasaun sira hanesan Austrália, Indonézia, Xina, Estadus Unidus Amérika, Japaun, Nova Zelándia, Kuba, no seluk tan”. Subliña Ministru Defeza.

Kontra Almirante Donaciano da Costa Gomes, Ph.D, iha ninia intervensaun kona-ba estadu frágil sira, nia suzere mós ba Organizasaun ba Kooperasaun no Dezenvolvimentu Ekonómiku (OCDE iha portugés) no Banku Mundiál atu inklui mós kestaun seguransa, justisa, servisu, transparénsia no ajuda mútua entre país sira.