Beijing, 31 de outubro 2023 – Ministru Defeza, Contra-Almirante Donaciano Gomes ‘Pedro Klamar Fuik’ partisipa iha Forum da-10 Xiangshan Pequim, husi 29 to’o 31 outubru, iha Sentru Konferénsia Internasional Pequim, Xina.

Forum Xiangshan Pequim, ne’ebé termina iha loron tersa-feira 31 outubru, atrai ema liu 1.800 ne’ebé reprezenta nasaun liu atus ida resin, rejiaun no organizasaun internasional sira ne’ebé diskute tópiku oi-oin, inklui responsabilidade husi nasaun prinsipal sira, kooperasaun iha matéria seguransa global nian, no arkitetura seguransa ba Ásia-Pasífiku, ho tema “Common security, lasting peace”.

Inisiativa Seguransa Global ne’e proposta husi Xina hodi ajuda rezolve kestaun barak husi governasaun ba seguransa global nian. Enkuantu plataforma fundamental ba promosaun inisiativa refere, Fórum Xiangshan Pequim konstitui oportunidade ida atu parte hotu buka solusaun ba problema seguransa no promove kooperasaun iha material seguransa nian iha ámbitu inisiativa nian hotu.  

Durante eventu, Ministru Defeza, Contra-Almirante Donaciano Gomes, Ph.D., aborda kona-ba “Arkitetura seguransa ohin no futuro nian”, ne’ebé reflete liu kona-ba kuadru jurídiku foun geopolítika iha Ásia-Pasífiku no natureza rivalidade entre nasaun zigante rua (EUA no Xina).

Contra-Almirante Donaciano Gomes ko’alia mós kona-ba kontribuisaun ASEAN ba seguransa regional no kontribuisaun husi ASEAN ba kuadru jurídiku seguransa Ásia-Pasífiku nian. Governante ne’e akresenta katak, maske ho nasaun ki’ik ho interese militar no komersial, seguransa Timor-Leste nian depende ba estabelesimentu husi relasaun forte ho nasuan viziñu no país amigu sira ne’ebé partilla valores respeitu no solidariedade, ne’ebé iha objetivu atu reforsa interese komun ba paz no estabilidade iha regiaun. 

“Ami iha konsiénsia katak prosessu ba konstrusaun ami-nia estadu no nasaun ne’e lidera ba objetivu paz. Ami fiar katak se la iha komunidade pasífika no ho dezenvolvimentu sustentável, sei laiha estabilidade no paz. Tanba ne’e, hanesan país no hanesan povo, ami hanoin katak kompromissu atu sai agente ba paz ne’e estratezia atu ami passa husi ami-nia fragilidade ba nasaun ida ne’ebé resilente liu tan”, akresenta husi Contra-Almirante iha ninia deklarasaun. 

Fórum refere mós permite atu país sira ne’ebé dezenvolve an hela Fórum bele rona sira, liu-liu durante diskusaun sira kona-ba kestaun relasiona ho Sul Global, grupu BRICS hanesan Brasil, Rússia, Índia, Xina, Áfrika do Sul. No estratejia ekonomia prinsipál  no kooperasaun husi Xina. Fórum ida ne’e nu’udar importante tebes iha ne’ebé bele konsidera preokupasaun no exizénsia legítima husi nasaun sira ne’ebé dezenvolve an hela.  

 Aleinde ne’e, diskute mós kestaun seguransa non tradisionál sira, hanesan siberseguransa no bioseguransa, Fórum mós organiza diskusaun kona-ba assuntu teknolojia no intelijénsia artifisial hodi melhora servisu sira hotu nasaun nian hodi kombate ameasa no hetan solusaun sira ba problema global sira ba longu prazu.

Durante Fórum, Pedro Klamar Fuik mós partilla polítika externa Timor-Leste iha eventu refere kona-ba “kria amizade no zero inimigu”, hodi prioritiza paz no estabilidade iha rejiaun.