Sexta-Feira 04 outubru 2024 - Ohin Ministériu Defeza hetan vizita ofisiál husi Embaxadora Estados Unidos Amérika, Sra. Donna Ann Welton iha edifísiu Ministériu Defeza Fatuhada, Díli.

Vizita ida ne'e ho objetivu mai hasoru S. E. Ministru Defeza, Kontra-Almirante Donaciano da Costa Gomes 'Pedro Klamar Fuik', Ph.D., hanesan responsavél ba setór Defeza no Kooperasaun iha IX-Governu konstitusionál hodi intensifika kooperasaun ne'ebé Estadus Unidus iha ho Timor-Leste iha ámbitu defeza militár nian.

S. E. Ministru Defeza Pedro Klamar Fuik hateten katak Estadus Unidos Amérika dezde períodu difisil liu iha 1999 sempre fó apoiu ba Timor-Leste para bele hakotu lalais krize ne'ebé Timoroan sira hasoru iha altura ne'ebá.

"Desde 1999 to'o ohin loron Estadus Unidos Amérika sempre fó apoiu nesesáriu iha setór hotu-hotu, inkluzivamente iha setór da defeza. Hanesan ita haré físikamente iha aeruportu Baucau ho aviaun ne'ebé mak sira kontribui no sira mós promove ezersísiu bar-barak ne'ebé hala'o iha ita-nia rain atu tulun ita-nia militár sira hodi artikula ho forsas profisional sira iha nível internasionál ba iha kualker misaun", hateten Ministru Defeza ba média sira hafoin remata enkontru ho embaixadora.

S. E. Ministru defeza subliña liu tan katak, atualmente, apoiu husi Estadus Unidos nian ne'ebé vizivél liu mak apoiu formasaun ne'ebé fó ba militár Timoroan sira hodi ba kontinua sira nia estudu iha eskola sira ne'ebé ho kategoria prestíjiu aas iha mundu no forma ofisiál sira ne'ebé diak teb-tebes ba Timor-Leste.

Husi sorin seluk, Embaixadora Estadus Unidus Amérika, Sra. Donna Ann Welton mós reitera nia vontade hodi hameno hela katak depois de Ministériu Defeza publika tiha polítika internasionál iha domíniu defeza mak  bele ko'alia fali ho parte Estadus Unidos atu bele hato'o parte saida mak nesesáriu iha nível kooperasaun ne'ebé rai rua ne'e bele halo hamutuk.

"Ami iha diskusaun interesante no kle'an kona-ba kooperasaun iha domíniu defeza nian no ami haksolok tebes ho ami-nia parseria ho Timor-Leste no ami buka atu kolabora diak liu tan ho IX-Governu hodi atinji sira nia prioridade iha setór defeza. No ami fiar katak kooperasaun ida ne'e sei fó benefísiu ba ekonomia no timoroan sira", hateten Embaixadora Estadus Unidos Amérika.

Enkontru ne'ebé realiza iha edifísiu Ministériu Defeza entre S. E. Ministru Defeza ho nia omóloga ne'e konta mós ho prezensa husi Diretór-Jerál polítika da Defeza, Sr. Nuno Carvalho.

Média MD