11 Outubru 2024 - S. E. Ministru Defeza, Kontra-Almirante Donaciano da Costa Gomes 'Pedro Klamar Fuik', Ph.D., Kinta-Feira horiseik, reprezenta S. E. Primeiru-Ministru Kay Rala Xanana Gusmão hodi partisipa iha aniversáriu International Finance Corporation (IFC) ba dala-20 iha Timor Plaza, Díli.

"Ohin ha'u mai iha ne'e hodi reprezenta S. E. Primeiru-Ministru Xanana Gusmão ne'ebé ho razaun balun la marka prezensa hamutuk ho ita iha ne'e. Hodi PM nia naran ha'u hakarak felisita IFC ba vizésimu (20) aniversáriu ba adezaun Timor-Leste ba organizasaun refere", dehan Ministru Defeza iha nia diskursu iha aniversáriu IFC nian iha Timor Plaza.

S. E. Ministru Defeza mós agradese ba apoiu konstante husi IFC ne'ebé ba tempu naruk kontinua apoia Timor-Leste no fiar katak apoiu hotu ne'ebé organizasaun sira fó ba país ida ne'e bele hakbi'it liu tan dezenvolvimentu ekonómiku Timor-Leste nian .

Governante ne'e subliña liu tan katak prioridade IX-Governu nian mak dezenvolvimentu ekonómiku, para alénde setór sira seluk, só ho diversifikasaun ba dezenvolvimentu ekonomia mak sei dudu setór sira sosiál sira hanesan saúde, edukasaun no sira seluk tan ho forma sustentável.

Media MD