Segunda-feira 18 novembru 2024- Parlamentu Nasionál liu husi debate espesialidade ba sesaun dadeer nian aprova ona Dotasaun Orsamentu Jerál Estadu (OJE) tinan fiskál 2025 ba Ministériu Defeza iha faze espesialidade, ho votus Afavór-44, kontra-0 no Abstensaun-20, iha Uma Fukun Parlamentu Nasionál.

S. E. Ministru Defeza, Kontra-Almirante Pedro Klamar Fuik iha nia intervensaun hateten katak "Defeza asuntu konsensuál ba nasaun, nune'e mós ba polítiku sira hotu atu bele hanoin hamutuk oinsá bele defende ita-nia soberania. Defeza nia kna'ar mak atu proteje no mantein vontade hasoru risku sira exterior nian ne'ebé atu sobu integridade Estadu RDTL nian".

Durante diskusaun, distintu deputadu sira husu mós klarifikasaun ba Ró rua ne'ebé Austrália atu oferese ba Timor-Leste no Timor-Leste nia desizaun hodi rejeita oferta refere.

Hatan ba preokupasaun ne'e, S. E. Ministru-Defeza, Kontra-Almirante Donaciano Costa Gomes 'Pedro Klamar Fuik', PhD, hateten katak relasiona ho IX-Governu nia pozisaun hodi rejeita Ró rua refere tanba iha razaun fundamentál tolu mak: 1) Kestaun téknika - husi kestaun téknika Ró ne'e hela loron hitu de'it iha tasi nune'e la iha kbi'it atu bele halo patrullamentu no vijilánsia; 2) kestaun logístika - Ró ne'e fó tan peso ba Timor-Leste nia orsamentu Estadu tanba logístikamente presiza 2 milhões kada tinan ba kombustível. 3) Kestaun polítika - hanesan nasaun soberanu ida, Timor-Leste iha nia interese rasik relasiona ho nia soberania, tanba ne'e Timor-Leste bele simu oferta no bele rejeita oferta tuir kapasidade orsamental ba asuntu tékniku nian.

S. E. Ministru Defeza fundamenta tan katak, Austrália promete pakote tolu mak hanesan: oferese Ró, harí portu no pakote manutensaun. Maibé, pakote rua ikus Austrália la konsegue kumpri, tanba ne'e mak hanesan nasaun soberania ida, Timor-Leste rejeita oferta refere no konsentra orsamentu sira ba populasaun nia bem-star.

Entretantu, Orsamentu Jeral Estadu 2025 ne'ebé aloka ba Ministériu Defeza ho total orsamentu hamutuk $ 10,938,078. Husi orsamentu refere fahe ba kategória sira hanesan: Saláriu no Vensimentu ho montante $ 3, 086,253, Bens no Servisu ho montante $ 7,051, 825 no Kapitál ba Dezenvolvimentu ho totál $ 800,000.

Média MD

Foto: credit ba RTTL. EP (Livestreaming)