Vientiane, RDP Laos, loron 20 Novembru 2024, Sua Exelénsia Xefe Estadu-Maiór-Jenerál F-FDTL, Tenente-Jenerál Falur Rate Laek, reprezenta Sua Exelénsia Ministru Defeza, Kontra-Almirante Donaciano do Rosário Costa Gomes, PhD, partisipa iha reuniaun multilateral ASEAN nian, ne`ebe koñesidu ho ADMM (ASEAN Defense Ministerial Meeting) ba dala-18, ne`ebe Timor-Leste partisipa hanesan membru observador desde tinan kotuk.

Iha nia intervensaun, Tenente-Jenerál Falur Rate Laek, agradese ba Vise-Primeiru-Ministru no Ministru Defeza Laos nian, Jenerál Chansamone Chanyalath nian ba konvite, lori S.Excia Ministru Defeza Timor-Leste nia naran apresia ba susesu tomak durante sai uma nain ba Simeira ASEAN iha tinan ne`e.

Timor-Leste ho Estatutu Observadór, Tenente-Jenerál Falur subliña katak enkontru ida ne`e hanesan marka ida importante hodi kontribui iha hanoin no Medida Konstrusaun Konfiansa (CBM`s) ba estabilidade estratéjika, dame no progresu ne'ebé buras iha rejiaun, haktuir ba lema "ASEAN: Hamutuk ba Dame, Seguransa no Reziliénsia".

Nia afirma tan katak Timor-Leste nu’udar Estadu ki’ik no foun, iha konxiénsia kona-ba implikasaun husi tendénsia jeopolítika no jeoestratéjika no nia impaktu ba nasaun ida-idak nia interese nasionál, ho nune`e esforsu koletivu atu hamriik hamutuk ho viziñu no belun rejionál sira iha ASEAN mak sei tane aas lema ASEAN nian ne`ebe temi iha leten.

Tuir nia observasaun, Timor-Leste fiar katak ADMM no ADMM Plus nu’udar plataforma ne`ebe loos atu hala’o polítika pozitiva ho hanoin atu mantein ekilíbriu estratéjiku iha ámbitu defeza no seguransa nian iha rejiaun, ne’ebé neneik-neneik sai nu’udar sentru gravidade ba tomada desizaun,  ne’eduni tuir nia, dalan ne`ebe seguru mak diálogu-komunikasaun regular ka liu husi diplomasia mak bele rezolve dezafiu sira seguransa kontemporáneu nian, promove integrasaun rejionál no haburas futuru ida ne'ebé prósperu ba sidadaun sira.

Ikus liu, Tenente-Jenerál Falur Rate Laek ne`ebe reprezenta S.Exia. Ministru Defeza kompromete atu kontinua hola medidas nesesárias hodi kumpri kestaun hirak ne’ebé diskute iha fórum internasional ne`e, reitera mos kompromisu nu’udar nasaun observadór atu hala’o no kumpri servisu sira ne’ebé define ho eskala ida ho relevánsia no prioridade boot.

Iha reuniaun Ministru Defeza ASEAN nian ne`e, Tenente-Jenerál Falur Rate Laek akompaña husi Dr. Nuno Carvalho dos Santos, Diretór Jerál Polítika Defeza Nasionál; Embaixadór Timor-Leste nian ba Laos, Dr. Filomeno Aleixo; Major José Pinto, Adjuntu Adidu Defeza Timor-Leste iha Jakarta; Major Jose Pinto, Ajudante de Campo; Tékniku husi Ministériu Defeza; no diplomata sira husi Misaun Diplomátika Timor-Leste iha Laos.

Média MD