Ohin, quinta-feira 11 junho 2026 - S. E. Ministru Defeza, Kontra-Almirante Donaciano Costa Gomes 'Pedro Klamar Fuik', Ph.D., asina akordu kooperasaun Militár ho governu Nova Zelândia, iha edifísiu Ministériu Defeza Fatuhada, Díli.

Enkontru virtuál entre S. E. Ministru Defeza Pedro klamar Fuik ho nia omólogo S. E. Ministru Defeza Nova Zelândia, Chris Penk, nia objetivu mak asina nota entendimentu ida entre país rua atu reforsa kooperasaun bilaterál iha domíniu defeza nian.

Akordu ne'ebé governante nain rua asina ne'e foku liu ba atividades hotu-hotu ne'ebé relasiona ho dezenvolvimentu forsas armadas nian, liu-liu iha área formasaun, área treinu no área sira seluk ne'ebé Timor-Leste presiza atu dezenvolve diak liu tan instituisaun F-FDTL.

"Nova Zelândia nu'udár país ida ne'ebé amigu no parseiru diak ba Timor-Leste dezde 1999, ho konfiansa no amizade ne'ebé forte, no ho kontribuisaun ba ita nia dezenvolvimentu no ba estabilidade rejionál. Ho kontribuisaun sira ne'e mak Timor-Leste observa no konsidera katak, Nova Zelândia importante atu ita estabelese kooperasaun", hateten S. E. Ministru Defeza hafoin termina enkontru virtuál.

Depois de Timor-Leste sai membru plenu ba ASEAN, akordu kooperasaun ho Nova Zelândia mak segundu akordu ne'ebé governu Timor-Leste realiza liu husi Ministériu da Defeza. Rekorda katak, akordu kooperasaun dahuluk ne'ebé estabelese  liu husi lideransa S. E. Ministru Defeza, Kontra-Almirante Donaciano  Gomes mak hamutuk ho país amigu Malázia ne'ebé asina iha loron 1 fulan novembru 2025, iha Kuala Lumpur Malázia.

Testemuña prezensial ba akordu kooperasaun entre Timor-Leste ho Nova Zelândia ne'e partisipa husi Chefe Gabinete Ministru Defeza, Sra. Ana Carla Carrascalão, Diretór Jerál Polítika Defeza Nasionál, Dr. Nuno Carvalho Santos, Diretór da Cooperação Internacional, Capitão Fragata Graduado, Duarte Borges Loe, no husi parte Nova Zelândia marka prezensa husi Embaixadora Helen Tunah, Adidu Defeza, Coronel Jeremy Ramsden, Sekretária segundu husi Embaixada Nova Zelândia, Sra. Chelsea Roberts no Sr. Philip Smith, asessor logístico ba F-FDTL.

Média MD