Ohin, Sexta-Feira 10 julho 2026 – S. E. Ministru Defeza, Kontra-Almirante Donaciano Costa Gomes ‘Pedro Klamar Fuik, Ph.D., partisipa iha serimónia Enseramentu ba 4^a Edisaun Kursu CEMCI (Estado-Maior Conjunto e Integrado) ba ano letivu 2025-2026 no Abertura ba Kursu 7^a Edisaun Kursu CPOS (Curso Promoção Oficiais Superiores) ba ano letivu 2026-2027, iha Sala Auditoriu F-FDTL Fatuhada, Díli.

Total formandu sira ne’ebé frekuenta iha 4^a Edisaun Kursu CEMCI ba tinan 2025-2026 hamutuk sanulu resin haat ne’ebé kompostu husi Ofisiais Superiores F-FDTL nain sia (Posto Major nain 7 no Posto Capitão-Tenente nain 2) no Ofisiais nain lima husi PNTL (Superintendente-Xefe nain 4 no Superintendente nain ida).

Iha Komponente Militár, kursu ida ne’e ho objetivu atu prepara Ofisiais sira ho tékniku Komandu no apoiu desizaun importante sira durante ezerse funsaun iha komandu, Xefia no Estado-Maior, iha Unidade no Órgaun sira Estrutura Superior F-FDTL no PNTL nian.

Aleinde ne’e, Kursu CEMCI nia finalidade mak atu kualifika ofisiais superiores sira ba dezempeña funsaun iha nível operasional no estratéjiku; atualiza no uniformiza kompeténsia no koñesimentu tékniku militar no polísial iha F-FDTL no PNTL; forma ofisiais superiores sira ho koñesimentu akadémiku perante dezafiu global hodi ba kumpri missaun ho diak iha prosesu dezenvolvimentu nasional.

Durante diskursu, S. E. Ministru Defeza, Kontra-Almirante Donaciano Costa Gomes ‘Pedro Klamar Fuik’, Ph.D., hateten katak, serimónia ida ne’e simboliza síklu de formasaun ida esizente no inísiu ba siklu foun ba aperfisionamentu profisional no sai mós perkursu permanente ho forma exelénsia ba modernizasaun instituisuan F-FDTL no PNTL ne’ebé konstante.

“História hatudu katak, Forsas Armadas ne’ebé hetan respeita boot, la’os tanba Instituisaun sira dispoen ekipamentu sira diak liu, mas liu-liu oinsá investe kontinuamente iha formasaun ba ninia joven feto no mane sira atu iha koñesimentu, dixiplina, lideransa,valores militares no liu-liu iha kredibilidade institusional”, dehan Kontra-Almirante Pedro Klamar Fuik.

Membru Governu ne’e mós parabeniza finalista sira husi Kursu CEMCI ne’ebé ho sakrifísiu no aproveitamentu finaliza kursu refere no husu atu kontribui diak liu tan ba instituisaun.

“Ohin imi konklui 4^a Kursu CEMCI, ha’u-nia felisitasaun bai mi hotu. Diploma ne’ebé ohin imi simu reprezenta la’os de’it kualifikasaun akadémika ou profisional, maibé reprezenta konfiansa ne’ebé instituisaun depozita ba imi atu assume responsabilidade boot atu kontribui ba planu estratéjiku no fortalese liu tan kapasidade institusional”, fundamenta S. E. Ministru Defeza.

S. E. Ministru Defeza Donaciano Gomes mós husu ba Formando CPOS edisaun ba dala 7 atu kontinua aproveita oportunidade ne’ebé instituisaun oferese hodi kapasita an diak liu tan nune’e bele fortalese instituisaun demokrátiku sira ho diak.  

Média MD