Ohin, Tersa-Feira 14 julho 2026 – Ministériu Defeza, Liu husi S. E. Ministru Defeza, Kontra-Almirante Donaciano Costa Gomes “Pedro Klamar Fuik”, Ph.D., Presidente Função Pública, Sr. Leténcio de Deus, S. E. Chefe Estado Maior General das Forças Armadas, Tenente-General Domingos Raul “Falur Rate Laek” hamutuk ho Estrutura F-FDTL no Instituto Defesa Nasional fó tomada de posse ba Comandante Academia Militar Conjunta, Capitão Fragata Graduado, Duarte Borgues Loe ho Estrutura AMC iha Auditorium Museum Resisténsia, Díli.

Serimónia toma posse ida ne’e nu’udar marku istóriku ida ba FALINTIL-Forsa Defeza Timor-Leste (F-FDTL) hafoin de selebrasaun 25 anos transformasaun FALINTIL ba F-FDTL ne’ebé realiza iha 2 Fevereiru 2026 ho lansamentu ofisiál ba Academia Militar Conjunta iha Suku Liurai, Munisípiu Aileu.

Iha Diskursu, S. E. Ministru Defeza, Kontra-Almirante Donaciano Costa Gomes “Pedro Klamar Fuik”, Ph.D. hateten katak, Academia Militar Conjunta la’os de’it estabelesimentu ensinu militar ida, maibé fatin atu forma futuru lideransa no aprende valores sira ne’ebé sustenta instituisaun militár ida. 

“Academia Militar Conjunta (AMC) mak fatin orijen ba paz, lideransa, dixiplina, kompeténsia profisional no valores sira ne’ebé sustenta instituisaun militár. Husi fatin ne’ebá mak sei forma mane no feto ne’ebé preparadu atu serbí Timor-Leste ho korajen, lealdade, onra no espíritu sakrifísiu nian”, dehan Kontra-Almirante Donaciano Gomes iha nia diskursu toma posse ba estrutura AMC iha Museum Resisténsia Díli.

Membru Governu ne’e subliña katak, investidura ba Komandante Academia Militar Conjunta reprezenta la’os de’it kontinuidade ba missaun F-FDTL nian, maibé renovasaun ba kompromisu ho exelénsia, inovativu no aperfeisoamentu permanente ba formasaun militár. “Lidera Academia signifika asumi responsabilidade atu prepara ofisiais sira diak liu tan atu enfrenta dezafiu iha ambiente estratéjiku ne’ebé komplexu liu, tan ne’e presiza mantein ho prinsípiu étiku, dixiplina no respeitu ba Estadu Direitu demokrátiku”.

Ba Estado-Maior Academia, S. E. Ministru Defeza husu atu hala’o responsabilidade ho didiak tanba selesaun ba Estrutura Academia Militar Conjunta ne’e bazeia ba dedikasaun no profisionalizmu atu asegura funsionamentu ba AMC ne’e rasik.

“Ba korpu dosente no instructor sira, ha’u expresa ha’u-nia konsiderasaun aas ba missaun ne’ebé imi sei assume atu transmit koñesimentu, dezenvolve kompeténsia, no liu-liu forma karáter husi sira ne’ebé loron ida sei komanda mane no feto sira ne’ebé sei serve nasaun no garante paz”, dehan Kontra-Almirante Pedro Klamar Fuik.

Ba Estudante sira ne’ebé sei frekuenta estudu iha Academia Militar Conjunta S. E. Ministru Defeza ho mensajen klaru – Academia ida ne’e reprezenta oportunidade atu fortalese koñesimentu tan ne’e aproveita ho didiak.

“Ba korpu Alunu foun sira, ha’u husik hela mensajen konfiansa no ezijénsia ida. Kada loron ne’ebé imi iha Academia reprezenta oportunidade ida atu fortalese imi-nia koñesimentu, aperfeiçoa imi-nia lideransa no konsolida valores sira ne’ebé distingue ofisiál F-FDTL ida. Uniforme ne’ebé imi hatais simboliza kompromisu permanente ba pátria no ezize dixiplina, humildade, dedikasaun no korajen, tan ne’e mantein valores sira ne’ebé distingue imi hanesan military ida”, konklui S. E. Ministru Defeza Pedro Klamar Fuik.

Média MD