Ohin, Segunda-feira 06 julho 2026 – Funsionáriu husi Ministériu Defeza hamutuk ho FALINTIL-Forsa Defeza Timor-Leste, Institutu Defeza Nasionál, no Autoridade Marítima Nasionál, realiza serimónia Isar Bandeira Nasionál ba primeira semana fulan julho, iha resintu Quartel-General Fatuhada, Díli. 

Hanesan inspetór ba serimónia, S. E. Ministru Defeza, Kontra-Almirante Donaciano Costa Gomes 'Pedro Klamar Fuik', Ph.D., iha nia mensajen hateten katak, serimónia isar Bandeira nu'udar tradisaun ida nobre ba servidór sira Estado nian no ba Instituisaun rasik tanba nia reprezenta korajén, sakrifísiu no esperansa husi povu ida ne'ebé dedika tomak nia vida ba konstrusaun Estado-Nasaun.

“Bainhira ita halo kontinénsia ba Bandeira Nasionál, ita halo hikas fali ita-nia kompromisu atu serve ita-nia povu ho lealdade, serve ho integridade, dixiplina no profisionalizmu. Bainhira ita serbí ita-nia pátria, ita-nia pátria ezize mós husi it aida-idak kompeténsia, dedikasaun no espíritu de missaun atu tau aas interese povo nian”, hateten Kontra-Almirante Pedro Klamar Fuik. 

Kontra-Almirante ne'e subliña katak serimónia kada fulan ne'ebé realiza ne'e importante teb-tebes atu hametin liu tan espíritu patriotizmu husi servidór sira Estado nian hodi tau aas interese Estadu nian liu interese individu nian.

S. E. Ministru Defeza Donaciano Gomes mós apela katak, ameasa sira ohin loron nian ezize atu instituisaun hotu-hotu prepara an diak liu tan atu responde ho efikaz ba ezijénsia sira tan ne'e mak presiza espíritu kooperasaun entre servidores sira Estado nian.

Média MD