Ohin, Tersa-Feira 14 julho 2026 – Ministériu Defeza, liu husi Diresaun Geral Polítika Defeza Nasionál (DGPDN) realiza sesaun partilha koñesimentu kona-ba Prosesu ADMM no planu ba futuru ADMM no ADMM-Plus, iha Edifísiu Ministériu Defeza Fatuhada, Díli.

Sesaun formasaun ida ne'e partilla husi Delegasaun Singapura ne'ebé lidera husi Coronel Daxon ho objetivu atu fasilita treinamentu, fahe informasaun no esperiénsia Singapura nian relasiona ho ASEAN Defence Ministers Meeting (ADMM) no ADMM-Plus ba funsionáriu sira iha Ministériu Defeza no Instituisaun tuteladu sira.

ADMM no ADMM-Plus nu'udár plataforma importante ida ba ASEAN ho nia parseiru diálogu sira atu hametin kooperasaun iha setór seguransa no defeza iha rejiaun Ázia-Pasífiku.

Durante abertura, Ministériu Defeza, liu husi Diretór Nasionál Kooperasaun Interministerial no Agência, Sr. Eduardo Malimau Afonso hato'o bem-vindo no agradese sinseramente ba disponibilidade husi Delegasaun Singapura ne'ebé disponível hodi partilha koñesimentu no experiénsia ba funsionáriu sira iha Ministériu Defeza Timor-Leste.

"Ami agradese no apresia ba Ministériu Defeza Singapura tanba depois de Timor-Leste nia adezaun ba ASEAN hanesan membru plenu, Singapura mak país ida ne'ebé hola inisiativa primeiru atu vizita Timor-Leste atu partilha experiénsia no koñesimentu relasiona ho ADMM no ADMM-Plus", dehan Diretor DNCIA.

Eduardo Malimau subliña liu tan katak, programa ida ne'e la'os de'it reprezenta oportunidade atu hasa'e koñesimentu profisional, maibé mós reflete amizade ne'ebé forte, respeitu mútua entre Timor-Leste no Singapura iha setór Defeza.

Formasaun ida ne'e efetivamente sei dura loron rua entre 14-15 julho no hetan partisipasaun máximu husi funsionáriu Ministériu Defeza no reprezentante husi Instituisaun sira ne'ebé tutela ba Ministériu Defeza.

Média MD